2 iyun 2012 00:54
Azərbaycanda keçiriləcək DÇ-nin püşkatmasına dünya ulduzları təşrif buyuracaq
Məlum olduğu kimi, iyulun 6-da Bakıda 17 yaşadək qızlardan ibarət yığmalar arasında 2012-ci ildə Azərbaycanda təşkil olunacaq dünya çempionatının püşkatma mərasimi keçiriləcək. Azerisport.az xəbər verir ki, sözügedən püşkatma mərasiminə dünya futbolunun bir sıra ulduzlarının da təşrif buyurması gözlənilir.
Lakin hələlik onların adları sirr olaraq saxlanılır. Qeyd edək ki, FIFA U-17 qadınlararası dünya çempionatı Azərbaycan 2012-nin rəsmi püşkatma mərasimi 6 iyul 2012-ci il tarixində saat 19:00-da Beynəlxalq Muğam Mərkəzində təşkil olunacaq. Mərasimdə FIFA U-17 qadınlararası dünya çempionatının FIFA təşkilat komitəsinin sədri Hany Abo Rida və AFFA-nın prezidenti Rövnəq Abdullayev də iştirak edəcək.
Çempionatda iştirak edəcək 16 komandadan 14-ü artıq bəllidir: Azərbaycan (ev sahibliyi edəcək ölkə olaraq iştirak avtomatik seçilib); Çin, Yaponiya və Koreya (AFC); Qambia, Qana və Nigeriya (CAF); Kanada, Meksika və ABŞ (CONCACAF); Braziliya, Kolumbiya və Uruqvay (CONMEBOL); və Yeni Zellandiya (OFC). Digər iki yığma komanda isə 26 və 29 iyun tarixləri arasında UEFA-da keçirilən oyunların nəticəsində bilinəcək.
Püşkatma mərasimindən öncə saat 17:30-da Beynəlxalq Muğam Mərkəzində mətbuat konfransı təşkil olunacaq. Mətbuat konfransı ərzində YTK və FIFA nümayəndələri çempionatın gedişatı və hazırlıqlarla bağlı açıqlama verəcək.
