Mahmud Qurbanov rəsmən Gəncə klubunun baş məşqçisi təyin olundu

Azərbaycanın veteran futbolçusu Mahmud Qurbanov oyunçu karyerasını başa vurub. Azerisport.az xəbər verir ki, son mövsümü “Sumqayıt”da keçirən təcrübəli pleymeyker daha bir il futbol oynamaq arzusunda olsa da, “Tərəqqi”dən aldığı sərfəli təklif onu fikrindən daşındırıb.

 

Belə ki, Gəncə təmsilçisi Mahmuda baş məşqçi olmaq təklifi ilə müraciət edib. Xeyli müddətdi davam edən danışıqların cümə gününə qədər davam edəcəyi gözlənilsə də, Qurbanov qarşı tərəfin təklifini daha tez dəyərləndirib. Belə ki, o, gəncəlilərlə 1 illik müqavilə ilə bağlı razılığa gəlib.

 

Bu barədə məlumatı “Tərəqqi”nin mətbuat xidmətinin rəhbəri Musa Abdullayev də təsdiqləyib: “İnanırıq ki, Mahmud futbol biliklərini öz yetirmələrinə lazımı səviyyədə çatdıra biləcək və komandamız yüksək yerlərdən birini tutaraq, Premyer Liqaya vəsiqə qazanacaq”.

 

Qeyd edək ki, “Tərəqqi” birinci divizionda çıxış edir. Bu komanda geridə qalan mövsümdə 14 komanda arasında 9-cu olmuşdu.