8 iyun 2012 18:50
Qubada Live Your Goals festivalı (FOTOREPORTAJ)
Quba Olimpiya İdman Kompleksində FIFA-nın bayrağı altında AFFA tərəfindən FIFA U-17 qadınlararası dünya çempionatı Azərbaycan 2012-nin təbliğatı çərçivəsində «Live Your Goals» – «Öz Məqsədini Yaşat» festivalı keçirilib. Azerisport.az xəbər verir ki, tədbirlə əlaqədar əvvəlcə mətbuat konfransı təşkil olunub.
Mətbuat konfransında Quba rayon İcra Hakimiyyəti başçısının müavini Afət Həsənova, futbol veteranı Asim Xudiyev, Azərbaycan milli komandasının üzvü Mahir Şükürov, 17 yaşadək qızlardan ibarət Azərbaycan yığmasının oyunçusu Jalə Məhsimova və FIFA U-17 qadınlararası dünya çempionatı Azərbaycan 2012-nin dostu, müğənni Çingiz Mustafayev iştirak ediblər.
Mətbuat konfransı başa çatdıqdan sonra tamaşaçıların alqış sədaları altında FIFA U-17 qadınlararası dünya çempionatı Azərbaycan 2012-nin maskotu Top-top Qız rəqs edərək stadiona daxil olub. Tədbirin aparıcısı maskotla bağlı tamaşaçılara ətraflı məlumat verərək festivalı açıq elan edib.
Çıxış edənlər bu festivalın Qubada keçirilməsindən məmnun olduqlarını bildirib, belə tədbirlərin qadın futbolunun təbliğində əhəmiyyətli rol oynadığını qeyd ediblər.
FIFA U-17 qadınlararası dünya çempionatı Azərbaycan 2012-nin dostu, müğənni Çingiz Mustafayevin ifa etdiyi mahnılar tamaşaçılarda şən əhval-ruhiyyə yaradıb.
Xüsusi təyin olunmuş məşqçilərin rəhbərliyi ilə futbol meydançasında festivalın qonaqlarına göstərilən master-klass tamaşaçıların böyük marağına səbəb olub. Festivalın sonunda tamaşaçılar dünya çempionatının maskotu Top-top Qızla şəkil çəkdirmək imkanı əldə ediblər.
