12 iyun 2012 02:28
2 rus azarkeşə 2 il müddətinə Polşa stadionlarına giriş qadağan olundu
Futbol üzrə Avropa çempionatının Çexiya ilə oyunu zamanı iğtişaşlara səbəb olan Rusiya yığmasının fanatlarından ikisi sərt cəza ilə üzləşib. Azerisport.az xəbər verir ki, onlar Polşa və Ukraynada düzənlənən qitə birinciliyinin növbəti oyunları zamanı arenaya buraxılmayacaqlar.
Polşa polisinin açıqlamasına görə, onlardan biri kişi, digəri isə qadındı. Hər iki rus azarkeş düz iki il boyunca bu ölkənin heç bir arenasına girə bilməyəcəklər. Bundan əlavə həmin azarkeşlər 460 avro məbləğində cərimə də olunublar. Çünki həmin iğtişaşlar zamanı “Vroslav” arenası da ciddi ziyan çəkmişdi.
Hazırda iğtişaşlarda iştirak etmiş digər azarkeşlərlə bağlı araşdırmalar davam etdirilir və yeni cəzalananların olması istisna deyil. Bu olaylara görə UEFA-nın da Rusiyanı cəzalandırması gözlənilir.
