12 iyun 2012 17:38
Azərbaycan yığmasının rəqibinin düşərgəsində qalmaqal
Futbol üzrə Portuqaliya yığma komandasının düşərgəsində qalmaqal baş verib. Azerisport.az xəbər verir ki, hazırda Polşa və Ukraynada keçirilən AÇ-2012-nin ilk turundakı uğursuzluq komandanın baş məşqçisi Paulu Bentu ilə kapitan Kristiano Ronaldonu üz-üzə qoyub.
Belə ki, Almaniya ilə oyundan (0:1) sonra Portuqaliya millisinin kapitanı əsəbi halda kapitan sargısını qolundan çıxararaq yerə tullayıb. Bundan sonra o, digər komanda yoldaşlarından fərqli olaraq, tribunaya yığışan azarkeşlərə tərəf gedib onları alqışlamaq əvəzinə birbaşa paltardəyişmə otağına yollanıb. Ronaldo hətta onun dayandırmaq istəyən baş məşqçi Paulo Bentunun da xahişini yerə salıb.
Lakin narazılıq bununla bitməyib. Məlumatda bildirilir ki, bundan sonra Bentu və Ronaldo arasında paltardəyişmə otağında da söz atışması olub. Bu zaman komandanın demək olar ki, bütün oyunçuları Ronaldoya qarşı çıxıblar. Onu yalnız “Real”dakı komanda yoldaşı Pepe dəstəkləyib. Ronaldoya qarşı çıxanlara isə Nani başçılıq edir.
Qeyd edək ki, Portuqaliya yığmamızın DÇ-2014-ün seçmə mərhələsindəki rəqiblərindəndi.
