13 iyun 2012 15:30
Ruslan Əmircanov da İnterdə
“Neftçi”nin müdafiəçisi Ruslan Əmircanov bundan sonra karyerasını “İnter”də davam etdirəcək. Azerisport.az xəbər verir ki, son iki ildə “ağ-qaralar”la Azərbaycan çempionu olan Əmircanov artıq yeni klubu ilə 1 illik müqavilə də imzalayıb.
Bu günlərdə o, “bankirlər”lə hazırlıqlara da start verəcək. İyun ayının 15-dən komanda yenidən bir araya gələcək və ikinci təlim-məşq toplanışına yollanacaq. Avroliqadakı təmsilçimizin iyun ayının 29-dək davam edəcək ikinci toplanışı Sloveniyada keçiriləcək.
Ruslan “İnter”i seçməsinin səbəbini də açıqlayıb. Saytımıza açıqlamasında o, bunları dilə gətirib: “Mən “İnter”i baş məşqçisinə görə seçdim. Kaxaber Tsxadadze ilə hələ “Standard”da onun rəhbərliyi altında oynadığım dövrdən tanışam. Ona görə də yenə bu mütəxəssislə işləməyə qərar verdim”.
Qeyd edək ki, Əmircanov “Neftçi”dən onun mövqeyinə yeni futbolçu almağa hazırlaşdıqları üçün ayrıldığını iddia edir. Onun xidmətində “Xəzər Lənkəran” da maraqlı idi.
