13 iyun 2012 11:26
AÇ-2012-də Polşa - Rusiya gərginliyi: küçə döyüşündən siyasətədək (FOTO, VİDEO)
Ötən gün AÇ-2012-də daha bir gərgin gün arxada qaldı. Azerisport.az xəbər verir ki, A qrupu çərçivəsində keçirilən Polşa – Rusiya oyunu xüsusi gərginliyi ilə diqqət çəkdi.
Məsələ burasındadı ki, həm bu görüşdən öncə, həm də oyun zamanı bir çox xoşagəlməz olaylar yaşandı ki, onlara toxunmamaq olmur. Öncə qarşılaşma ərəfəsində baş verən olaylardan söz açmaq istərdik. Hansı ki, belə olayların baş verməsi tam gözlənilən idi. Çünki rus fanatlar öz aqressivliklərini hələ Çexiya ilk oyundan sonra stadion işçiləri ilə döyüşə çıxmaqla nümayiş etdirmişdilər.
Polşa - Rusiya oyunu öncəsi rusiyalı fanatlar Varşavada yürüşə çıxmağa qərar vermişdilər. Lakin bu yürüş ciddi olaylarla yadda qaldı. Belə ki, yürüş zamanı hər iki komandanın azarkeşləri arasında dava düşüb. Şəhərin müxtəlif yerlərində baş verən münaqişələr zamanı polis hətta sakitlik yaratmaq üçün havaya güllə atmaq məcburiyyətində qalıb, eləcə də gözyaşardıcı və bibər qazından istifadə edib.
Qeyd edək ki, dava nəticəsində hər iki tərəfdən xeyli sayda ciddi xəsarət alanlar olub. Döyüşlərdə iştirak edən ən “fəal” azarkeşlər həbs olunublar. Saxlanılanların sayı 50-dən çox olub.
Lakin Polşa – Rusiya oyunundan öncəki gərginlik bununla da kifayətlənməyib. Belə ki, Varşavada keçirilən oyun zamanı da siyası qalmaqala səbəb olacaq ciddi hadisə baş verib. Qarşılaşmanın startında Rusiyanın dövlət himni səslənən zaman bu ölkədən olan azarkeşlər üzərində (This is Russia) (Bura Rusiyadı) sözləri yazılmış pankart açıblar. Bu zaman polşalı azarkeşlər rus azarkeşlərini fitə basmağa başlayıblar. Tühlükəsizlik qüvvələrinin də müdaxiləsindən sonra ruslar bu siyasi pankartı yığışdırıblar. UEFA-nın bu məsələylə bağlı hansı qərar verəcəyi maraq doğurur.
Qeyd edək ki, Rusiya ərazisində Polşa prezidenti Lex Kaçinskinin ölümü ilə nəticələnən təyyarə qəzasından sonra iki ölkə arasında siyasi gərginlik davam edir. Bu gərginliyin nəticəsidi ki, bu oyun ərəfəsində bu qədər ciddi olaylar baş verdi. Qarşılaşmaya gəlincə, sonda tərəflər meydandan sülhlə ayrıldılar.
