14 iyun 2012 18:17
Samir Əliyev: Ola bilsin ki, Neftçinin ÇL-dəki hansısa oyununda 2-3 dəqiqə meydanda oldum
Futbol üzrə Azərbaycan yığmasının sabiq hücumçusu Samir Əliyev vida matçı keçirməyə hazırlaşır. Azerisport.az xəbər verir ki, onun vida görüşü Azərbaycan çempionu “Neftçi”nin ölkəmizi təmsil edəcəyi UEFA Çempionlar Liqasının təsnifat mərhələsinin oyunlarına da təsadüf edə bilər.
Bu barədə təcrübəli futbolçu saytımıza müsahibəsində özü məlumat verib: “Böyük futboldan getmək və buna görə vida matçı keçirmək istəyirəm. Ola bilsin ki, “Neftçi”nin Çempionlar Liqasındakı hansısa oyununda 2-3 dəqiqə meydanda oldum. Amma başqa hər hansı bir oyunda da ola bilər. Hər halda iki aydı özüm üçün hazırlaşıram, məşq edirəm”.
Qeyd edək ki, Samir Əliyev hələ ötən mövsümün əvvəlindən etibarən “Neftçi”nin düşərgəsinə qoşulmuşdu. Onun bəzi oyunlarda meydana çıxmasına dair ehtimallar olsa da, Əliyev sadəcə komanda ilə məşqlərdə iştirak edə bildi. Görünür digər klublardan da təklif ala bilmədiyi üçün o, karyerasını başa vurmağa qərar verib.
Yeri gəlmişkən, Əliyev artıq bundan sonra nə işlə məşğul olacağını da müəyyənləşdirib: “Vida oyunu keçirdikdən sonra məşqçiliyə başlayacağam. “Neftçi”nin əvəzedici heyətində çalışacağam”.
