16 iyun 2012 11:27
Vaqif Sadıqov: Komandada kimi saxlayacağımıza Bakı ilə oyundan sonra qərar verəcəyik
AZAL-ın baş məşqçisi Vaqif Sadıqov azerisport.az saytına müsahibəsində komandasının yeni mövsümə hazırlıqlarından, transferlərdən, eləcə də AÇ-2012-dən danışıb. “Təyyarəçilər”in çalışdırıcısı öncə bunları dilə gətirib:
“Hazırda seleksiya xarakterli təlim-məşq toplanışı keçiririk. Hazırlıq prosesində Çexiya, Gürcüstan və digər ölkələrdən futbolçular var. “Bakı” ilə yoxlama oyunu keçirəndən sonra (oyun bu gün keçiriləcək – azerisport.az), onlardan hansının komandada qalacağına aydınlıq gələcək. Hər şey onların özlərini necə göstərməsindən asılıdı”.
Paytaxt klubunun əsas hazırlıqlarına gəlincə, bu toplanış iyunun 18-dən etibarən başlayacaq: “Həmin gündən etibarən iyunun sonuna qədər Bakıda hər gün iki məşq keçəcəyik. Bu müddət ərzində iki yoxlama oyunu keçirməyi də planlaşdırmışıq. İyulun 2-də isə Türkiyəyə yollanacağıq. İspartada da üç yoldaşlıq oyunu baş tutacaq. Ardından Boluya gedəcəyik. İyulun 16-dan 28-dək sürəcək son hazırlıq prosesi zamanı da 4 sınaq matçı keçirmək nəzərdə tutulub. İyulun 29-da da vətənə qayıtmalıyıq”.
Sadıqov hələlik mümkün rəqiblərin kimliyini dəqiqləşdirmədiklərini deyir: “Hələlik mümkün rəqiblərdən heç birinin adını dəqiqləşdirməmişik. Bütün bunlara Türkiyə toplanışının gedişində aydınlıq gətiriləcək”.
Təcrübəli mütəxəssis Ukrayna və Polşada keçirilən Avropa çempionatının gedişinə də toxunub: “Çempionatın gedişindən hələ ki, razıyam. Bu qitə birinciliyinin ürəyimcə olmasının əsas səbəblərindən biri də odu ki, artıq ikinci turun oyunları geridə qalmasına rəğmən, heç bir qrupda pley-offa çıxan komanda olmayıb”.
Millimizin sabiq çalışdırıcısı azarkeşlik etdiyi yığmanın adını da açıqlayıb: “Mən özüm Hollandiyaya azarkeşlik edirəm. Amma təəssüf ki, turnir onlar üçün o qədər də yaxşı başlamadı. Lakin hələ hər şey itirilməyib. Hər şey son turun oyunlarından asılıdı”.
“Təyyarəçilər”in çalışdırıcısı sonda Azərbaycan klublarının qarşıdan gələn avrokuboklardakı şanslarına da toxunub: “İstərdim ki, nəhayət bizim klublar da ciddi uğurlar qazansınlar. Baxmayaraq ki, burda çox şey püşkdən asılı olacaq. Bütün klublarımıza arzulayıram”.
