19 iyun 2012 13:19
Bakı serb qapıçıdan imtina edib, Luis Enrike ilə danışıqları bərpa etdi
Avropa Liqasına hazırlaşan “Bakı” qapıçı axtarışlarını davam etdirir. Azerisport.az xəbər verir ki, Marko Şarliya ilə yollarını ayırdıqdan sonra yaxşı “çərçivə” qoruyucusu yönündə axtarışa çıxan “zolaqlılar” hələ ki, seçimini edə bilməyib.
Bu arada paytaxt klubunun məşqçilər korpusu baxışa çağırılan Nikola Miloyeviçdən imtina edib. Serbiyalı qapıçı etimadı doğrulda bilmədiyindən geri göndərilib.
Belədə “Bakı” yenidən Kolumbiya yığmasının qapıçısı Luis Enrike Martineslə danışıqları bərpa edib. İlkin danışıqlar zamanı razılığa gələ bilməyən tərəflər müqavilə imzalamağı planlaşdırır. “Neko” ləqəbli qapıçı 2010-cu ildən vətənində – “Once Caldas” klubunda çıxış edir. O, bu komandada 38 oyuna çıxıb. Enrike 2006-2009-cu illərdə Türkiyənin “Sakaryaspor” klubunda oynayıb və qardaş ölkədə 43 oyun keçirib. 2007-2008 mövsümündə “Manisaspor”a icarəyə verilən futbolçu vətənində “Envigado”, “Atletico Huila”, “Guanacasteca”, “Santa Fe” kimi klubların da şərəfini qoruyub. Luis Enrike 2003-cü ildən bəri Kolumbiya yığmasında 14 oyun keçirib və 1 qol vurub.
