19 iyun 2012 16:35
Didye Droqbanın yeni klubu müəyyənləşdi
Çinin “Şanxay Şenxua” klubu Kot d`İvuar milli komandasının futbolçusu Didye Droqba ilə müqavilə bağlayıb. Azerisport.az xəbər verir ki, bu barədə klubun sahibi Çju Cun “France Presse” agentliyinə açıqlama verib.
Droqba 2004-cü ildən İngiltərənin “Çelsi” komandasında çıxış edib. O, “zadəganlar”la 3 dəfə İngiltərə çempionluğu, 4 dəfə ölkə kuboku, 2012-ci ildə isə Çempionlar Liqasını qazanıb. Lakin afrikalı oyunçu klubla yeni müqavilə məsələsində razılığa gələ bilməyib.
Çin mətbuatı yazır ki, 34 yaşlı forvardın “Şanxay Şenxua”da həftəlik qazancı 314 min avro olacaq. Bununla da Droqba Çin çempionatının ən ödənişli futbolçusuna çevriləcək. Əvvəllər bu kluba “Çelsi”nin digər forvardı Nikolya Anelka keçib. Jan Tiqananın baş məşqçi postundan istefasından sonra Anelka bir müddət komandanın sükanı arxasında olub. Hazırda bu vəzifəni Argentina yığmasının sabiq baş məşqçisi Serxio Batista tutur.
Qeyd edək ki, Çin çempionatında 13 turdan sonra “Şanxay Şenxua” 14 xalla 12-ci pillədə qərarlaşıb.
