20 iyun 2012 19:07
Simurq Türkiyəyə yola düşür
"Simurq" Peşəkar Futbol Klubu növbəti mövsüm üçün hazırlıqlara start verib. Azerisport.az xəbər verir ki, artıq komanda təlim-məşq toplanışının birinci hissəsini başa vurmaq üzrədi. İyunun 15-dən bir araya gələn və 16-dan məşqlərə başlayan Zaqatala təmsilçisi gündə iki dəfə olmaqla hazırlıq prosesini davam etdirir.
Əsasən fiziki hazırlıq üzərində çalışan Georgi Çixradzenin yetirmələri iyunun 22-dək təlim-məşq toplanışını davam etdirəcək. Bir günlük istirahətdən sonra "Simurq" hazırlığın ikinci mərhələsi üçün Türkiyəyə yollanacaq.
İyulun 6-na qədər Kartepe istirahət zonasında qalacaq komandamız burada 3 yoldaşlıq görüşü keçirdəcək. Hələlik rəqiblərin kim olacağı müəyyənləşməsədə, baş məşqçi Georgi Çixradze burada bir çox yerli və legioner futbolçuları baxışdan keçirdəcək. Daha sonra vətənə qayıtmağı planlaşdıran komandamız hazırlığın növbəti mərhələsini Zaqatalada davam etdirəcək.
