22 iyun 2012 00:05
Polşalılar Berti Foqtsu yığmamızdan ayırır
Futbol üzrə Azərbaycan yığması baş məşqçisiz qala bilər. Azerisport.az xəbər verir ki, Polşa Futbol İttifaqı yığmamızın baş məşqçisi Berti Foqtsla ciddi şəkildə maraqlanır.
Hazırda davam edən Avropa çempionatını yaxından izləyən azerisport.az saytının müxbirinin əldə etdiyi məlumata görə, Polşa yığmasının uğursuz çıxışından sonra istefaya göndərilən Frantişek Smudanın boşaltdığı posta iki əsas namizəd var. Bunlardan biri polşalı mütəxəssis Valdemar Fornalik, digəri də yığmamızı çalışdıran Berti Foqtsdu.
Bu barədə məlumatı azerisport.az saytının müxbiri ilə söhbətində “İnternia”nın əməkdaşı, polşalı jurnalist Mixail Bialonski də təsdiqləyib. Polşa Futbol İttifaqının prezidenti Qjeqoj Lyato isə bunları dilə gətirib: “İyulun 27-də PFİ bu məsələni daha ətraflı müzakirə etməyə hazırlaşır. Hələlik iki rəsmi namizəd var. Bunlardan biri yerli Valdemar Fornalik, digəri isə əcnəbidi – almaniyalı Berti Foqts. Ümid edirəm ki, düzgün seçim edə biləcəyik”.
PFİ prezidenti hətta Foqtsla görüşməyə də imkan tapıb: “Bəli, Berti Foqtsla görüşmüşəm. Mən ona dəqiq başa saldım ki, yığmamızın baş məşqçisi ola bilər. Lakin hər şeyin necə alınacağını zaman göstərəcək”.
Qeyd edək ki, Foqtsun hazırda AFFA ilə müqaviləsi var. Bu müqaviləyə əsasən almaniyanlı mütəxəssis ən azı DÇ-2014-ün seçmə mərhələsinin sonuna qədər yığmamızı çalışdırmalıdı. Polşalıların onu millimizdən ayırmaq cəhdlərinin nə dərəcədə uğurlu olacağını isə zaman göstərəcək.
