23 iyun 2012 01:47
Kiyev Dinamosunun sabiq üzvü Bakıda (FOTO)
“Bakı” baxışa yeni futbolçu dəvət edib. Azerisport.az xəbər verir ki, bu, xorvatiyalı Denis Qlavinadı.
26 yaşlı xorvat oyunçu həm müdafiədə, həm də yarımmüdafiədə oynayır. Baş məşqçi Novruz Əzimov Qlavinanı ötən gün Xorvatiyanın “Osijek” klubu ilə oyunda da sınaqdan keçirib. Onunla bağlı yaxın günlərdə qərar veriləcək.
Qeyd edək ki, Denis Qlavina Zaqreb “Dinamo”sunun yetirməsidi. 18 yaşına qədər bu komandada oynayan futbolçu 2004-cü ildə Kiyev “Dinamo”suna transfer olunub. Lakin o, 2008-ci ilə qədər məxsus olduğu komandanın əsas heyətində debüt etməyib və əvəzedici komandada 22 oyun keçirərək, 2 qol vurub. 2005-2006 mövsümündə Ukraynanın “Vorskla” (29 oyun, 6 qol), 2006-da “Dnepr” (9 oyun), 2007-2008-də yenidən “Vorskla” klubuna icarəyə verilib (38 oyun, 5 qol). 2008-ci ildə “Vorskla”ya transfer olunan (27 oyun, 3 qol) Denis 2009-cu ildə Zaqreb “Dinamo”suna icarəyə verilib (4 oyun). Qlavina 2010-2011 mövsümünü Polşanın “Arka” klubunda keçirib (20 oyun, 1 qol). O, bir müddət əvvəl Xorvatiyanın “Varajdin” klubu ilə müqavilə bağlasa da, indi “Bakı”da baxışdan keçir.
2009-cu ildə “Vorskla”nın heyətində Ukrayna kubokunu qazanan futbolçu Xorvatiyanın aşağı yaş qrupları üzrə yığma komandalarında çıxış edib. Belə ki, o, 2002-ci ildə U-16 (6 oyun, 4 qol), 2002-2003-də U-17 (13 oyun, 5 qol), 2004-2005-də U-19 (5 oyun, 1 qol), 2007-də U-20 (1 oyun) və 2006-2007-lə U-21 (8 oyun) yığmalarında çıxış edib.
