25 iyun 2012 19:53
Avroliqadakı klublarımız ilk oyunu harda keçirəcək?
Avropa Liqasının birinci təsnifat mərhələsinin püşkatmasına əsasən Azərbaycanın bu turnirdəki bütün təmsilçiləri ilk oyunlarını evdə keçirməli olacaqlar. Lakin azerisport.az saytının məlumatına görə, UEFA belə olan halda püşkün nəticələrində bəzi dəyişikliklərə əl atır.
Bu dəyişikliklərə görə isə, klublarımızdan biri ilk oyunu evdə yox, səfərdə keçirməli olacaq. Bu, “İnter”in bəxtinə düşüb. “Bankirlər” Estoniyanın “Trans” klubu ilə ilk oyununu səfərdə, cavab görüşünü evdə keçirəcək.
Estoniyanın “Nomme Kalju” klubu ilə qarşılaşacaq “Xəzər Lənkəran” və Sloveniya “Mura”sı ilə üz-üzə gələcək “Bakı” isə püşkə uyğun olaraq, ilk oyunu evdə keçirməlidi. Halbuki, “zolaqlılar” da ilk oyunu səfərdə keçirməkdə maraqlıdılar.
Xatırladaq ki, Avroliqada ilk təsnifat mərhələsinin oyunları iyulun 5-də və 12-də keçiriləcək.
