26 iyun 2012 01:32
Xəzər Lənkəranda iki yeni futbolçu
“Xəzər Lənkəran” baxışa daha iki futbolçu dəvət edib. Azerisport.az xəbər verir ki, bu xorvatiyalı Qoran Mujanoviç və danimarkalı Kim Aabeçdi.
Yarımmüdafiənin hər iki cinahında oynayan xorvatiyalı futbolçunun 28 yaşı var. O, karyerasına vətənində – yetirməsi olduğu “Varteks”də başlayıb və 2002-2005-ci illərdə bu klubun şərəfini qoruyub (61 oyun, 9 qol). 2002-2003 mövsümündə Xorvatiyanın “Pomorats” klubuna icarəyə verilən (29 oyun, 3 qol) Mujanoviç 2005-2007-ci illərdə Belçikanın “Lyerse” klubunda top qovub (34 oyun, 3 qol). 2007-ci ildə yenidən “Varteks”ə dönən Qoran 2010-a qədər doğma komandasının uğurları üçün çalışıb (86 oyun, 22 qol). Mujanoviç son iki mövsümü Xorvatiyanın “Slaven” (Belupo) klubunda keçirib (54 oyun, 7 qol).
Bu futbolçu Xorvatiyanın bütün aşağı yaş qrupları üzrə yığma komandalarında çıxış edib. Belə ki, o, 1998-1999-cu illərdə U-15-in (3 oyun), 1999-da U-16 (6 oyun, 1 qol), və U-17-nin (1 oyun), 2001-də U-18 (2 oyun) və U-19-un (1 oyun), 2002-2003-də U-20-nin (6 oyun), 2004-2005-də isə U-21-in (13 oyun) formasını geyinib. Aşağı yaş qrupları üzrə yığmalarda 32 oyun keçirən Mujanoviç A milliyə dəvət ala bilməyib.
Aabeç isə elə də çox klubun şərəfini qorumayıb. Belə ki, o, 2004-cü ildən “Lyngby”də çıxış edir. Kim bu komandada 115 oyun keçirib və 33 qola imza atıb.
Yeri gəlmişkən, artıq bu futbolçular Avstriya toplanışı çərçivəsində keçirilən yoxlama oyununda sınaqdan da keçiriliblər. Rumıniyanın gümüş medalçısı " Vasluy" komandası ilə görüşdə "Xəzər Lənkəran" meydana bu start heyəti ilə çıxıb: Kamran Ağayev, Eder Bonfim, Manuel Skarlatake, Ruslan Abışov, Elnur Allahverdiyev, Adrian Pits, Qoran Mujanoviç, Kim Aabeç, Rikardo Qomeş, Roberto Alviz, Rahid Əmirquliyev. Fasilədən sonra baş məşqçi Yunis Hüseynov Rendal Brenes, Elnur Abdullayev, Sadio Tounkara, Branimir Subaşiç və Radomir Todorovu meydana buraxıb.
