26 iyun 2012 21:40
Neftçi İran çempionuna qalib gəldi (YENİLƏNİB)
Türkiyənin Bolu şəhərində təlim-məşq toplanışında olan “Neftçi” bu gün qardaş ölkədəki hazırlıq prosesi çərçivəsində növbəti yoxlama matçına çıxıb. Azerisport.az xəbər verir ki, Azərbaycan çempionu İran klubu ilə qarşılaşıb.
Belə ki, “Neftçi”nin rəqibi sonuncu İran çempionu “Sepahan” olub. Qeyd edək ki, 1953-cü ildə yaradılan “Sepahan” 2011-2012 mövsümündə İran Pro Liqasının qızıl medallarını qazanıb. Tarixi ərzində 4 dəfə İran çempionluğunu və 3 dəfə ölkə kubokunu qazanan komanda 2007-ci ildə Asiya Çempionlar Liqasının finalında oynayıb.
"Neftçi" belə bir rəqiblə görüşdə uğur qazanmağı bacarıb. İlk yarıda Flavinyonun vurduğu qol matçda yeganə olub.
Böyükağa Hacıyev ilk dəqiqələrdən aşağıdakı heyətə güvənib: Rauf Mehdiyev, Elvin Yunuszadə, İqor Mitreski, Kənan Manafov, Cavid İmamverdiyev, Bruno Bertuççi, Flavinyo, Emin Mehdiyev, Rəşad Sadiqov, Julius Vobay, İlham Allahverdiyev.
İkinci hissədə bakılıların heyətində Saşa Stamenkoviç, Amit Quluzadə, Tərlan Quliyev də meydana çıxmaq imkanı qazanıb.
Qeyd edək ki, “Neftçi” bundan öncə Rusiyanın “Mordoviya” klubu ilə qarşılaşmış və 0:4 hesabıyla məğlub olmuşdu.
Yoxlama oyunu
26 iyun
NEFTÇİ – SEPAHAN - 1:0
Qol: Flavinyo.
