26 iyun 2012 12:44
Rusiya futbolu başsız qaldı
Rusiya Futbol İttifaqının (RFİ) prezidenti Sergey Fursenko tutduğu vəzifədən istefa verib. Azerisport.az xəbər verir ki, Fursenko hələlik qərarının dəqiq səbəbini açıqlamayıb.
Lakin o, Rusiya yığmasının 2012-ci il Avropa çempionatındakı uğursuz çıxışı ilə əlaqədar azarkeşlərdən üzr istəyib. Fursenko Rusiya prezidenti Vladimir Putinlə görüşündə RFİ prezidenti postunu tərk etmək qərarına gəldiyini bəyan edib. Putin isə istefanı qəbul edərək, ona gördüyü işlərə görə təşəkkürünü bildirib: “Ümidvaram ki, hər şey öz yerini tutacaq”.
Rusiya prezidenti Fursenkodan UEFA İcraiyyə Komitəsi üzvlüyündən ayrılmamağı xahiş edib: “Biz bu yeri itirməməliyik. Xahiş edirəm ki, bu vəzifədə işinizi davam etdirəsiniz”.
Qeyd edək ki, Rusiya millisi Avropa çempionatında ən asan qrupdan 1/4 finala çıxa bilməyib. A qrupundakı rəqiblərindən Çexiyaya 4:1 hesabı ilə qalib gələn şimal qonşularımız Polşa ilə heç-heçə edib - 1:1. Son matçında isə Yunanıstana 0:1 hesabı ilə uduzan baş məşqçi Dik Advokatın komandası qrupda qalıb. Növbəti mərhələyə isə Çexiya ilə Yunanıstan yüksəlib. Hələ çempionat öncəsi Hollandiya PSV-si ilə müqavilə bağlamış Advokat artıq Rusiya millisindən ayrılıb. Yeni baş məşqçi hələlik təyin olunmayıb.
Sonda onu da bildirək ki, Rusiya millisi 2014-cü il dünya çempionatının seçmə mərhələsində Azərbaycan millisi ilə eyni qrupda yer alır.
