27 iyun 2012 00:43
Tixon Şişov: XL Nomme Kalju ilə görüşün favoritidi
Xəbər verdiyimiz kimi, “Xəzər Lənkəran”ın Avropa Liqasının birinci təsnifat mərhələsindəki rəqibi “Nomme Kalju”nun heyətində vaxtilə cənub təmsilçisinin şərəfini qorumuş Tixon Şişov da çıxış edir. Azerisport.az xəbər verir ki, Estoniya klubunun müdafiəçisi müsahibəsində “ağ-yaşıllar”a rəqib olmalarından danışıb.
Bəribaşdan qeyd edək ki, Şişov 2010–2011 mövsümündə “Xəzər Lənkəran”ın şərəfini qoruyub. Azərbaycandan ayrılandan sonra isə o, vətənində top qovur. “Nomme Kalju”nun arxa xətt oyunçusu keçmiş komandasına rəqib olmalarından sevincli olduğunu gizlətmir:
“Püşkatmadan razıyam. Keçmiş komandama qarşı oynamağı çox istəyirəm. Düzünü deyim ki, “Xəzər Lənkəran” barədə nə dərəcədə faydalı informasiya verə biləcəyimi bilmirəm. Çünki orda oynamağımdan artıq iki ilə yaxın bir müddət keçib. Amma məncə, bu cütün favoriti azərbaycanlılar hesab olunacaqlar. Onların heyətində güclü legionerlər var və yəqin ki, səviyyələri də daha yüksəkdi”.
Lakin Estoniya yığmasının müdafiəçisi özlərinin də mərhələ adlamaq şanslarının olduğunu iddia edib: “Şübhəsiz ki, bizim də növbəti mərhələyə adlamaq şansımız var. Məsələn, iki il əvvəl mən “Xəzər Lənkəran”ı tərk edərkən, onlar Avropa Liqasında Moldova “Olimpia”sı ilə qarşılaşdılar. Kağız üzərində rəqibdən daha güclü olmalarına baxmayaraq, “Xəzər Lənkəran” o vaxt bu rəqibini keçə bilmədi”.
“Xəzər Lənkəran”la “Nomme Kalju” arasındakı ilk oyun iyulun 5-də Lənkəranda keçiriləcək. Şişov bu oyundan danışarkən aşağıdakıları qeyd edib: “Azərbaycanda keçiriləcək səfər oyununu düşünərkən həyəcanlanıram. Amma qorxmağa dəyməz. Şübhəsiz ki, Lənkərana qələbə üçün gedəcəyik. Lakin bu çətin səfərdə heç-heçə də bizim üçün pis nəticə sayılmamalıdı”.
Şişov Lənkərana səfərin çətin olacağını da vurğulayıb: “Lənkərana səfər həqiqətən də çox çətin olacaq. Bu şəhər Bakıdan təxminən 300 km aralıda yerləşir. Amma açığını deyim ki, mən orda oynayarkən Azərbaycandakı yollar o qədər də yaxşı deyildi”.
