27 iyun 2012 13:18
“Bakıya 0:4 hesabı ilə uduzmağımız sizi aldatmasın”
Sloveniyanın “Mura” klubunun vitse-prezidenti Matey Puxan azerisport.az saytına müsahibəsində Avropa Liqasının birinci təsnifat mərhələsində “Bakı”ya rəqib olmalarından, eləcə də şanslarından danışıb.
“Püşkatmanın nəticəsi ilə bağlı birmənalı fikir söyləmək çətindi. Bunun yaxşı və ya pis olduğunu deyə bilmərəm. “Bakı”nı o qədər də yaxşı tanımıram. Lakin eşitdiyimə görə, yaxşı komandadı. Fikrimcə, bizi maraqlı oyun gözləyir”.
O, hələ rəqibi bundan sonra öyrənəcəklərini deyir: “Hazırda “Bakı” haqda informasiyamız o qədər də geniş deyil. Amma bizim hələ vaxtımız var. Çalışacağıq ki, rəqibimizi daha yaxından öyrənək”.
Puxanı narahat edən məqamlar da var: “Düzü, biz püşkdən öncə Sloveniyaya yaxın olan bir ölkə təmsilçisinə rəqib olmağı arzulayırdıq. Lakin indi bizi Azərbaycana kifayət qədər uzun və çətin səfər gözləyir. Bu da bizi məyus etməyə bilməz. Axı belə səfərlər də maddi cəhətdən baha başa gəlir”.
“Mura” rəsmisi komandasının bir neçə gün öncə “Bakı” ilə yoxlama matçında 0:4 hesablı yenilgisinə də toxunub: “Bu, sadəcə yoxlama matçı idi. Bizim heyətimizdə daha çox ehtiyatda qalan və gənc futbolçular yer almışdılar. Bu nəticə sizi aldatmamalıdı”.
Qeyd edək ki, “Bakı” ilə “Mura” arasındakı ilk oyun iyulun 5-də “Dalğa Arena”da, cavab görüşü isə ayın 12-də Sloveniyada baş tutacaq.
