27 iyun 2012 01:33
Almaniya yığması Bakıya gəlir
Sentyabr ayının 22-də başlayacaq və 21 gün davam edəcək FIFA U-17 qadınlararası dünya çempionatı Azərbaycan 2012-də çıxış edəcək daha bir ölkənin adına aydınlıq gəlib. Azerisport.az xəbər verir ki, Almaniya yığması Avropa çempionatında fianal yüksəlməklə Azərbaycana gəlməyə haqq qazanıb.
Almanlar Danimarka ilə yarımfinal oyununda 2:0 hesabıyla qalib gəliblər. Bu isə, DÇ-yə vəsiqə üçün yetərli olub. Xatırladaq ki, digər yarımfinal matçında da Fransa İsveçrəni məğlub edərək, həm finala çıxmışdı, həm də Azərbaycanda keçiriləcək mundiala vəsiqə qazanmışdı.
Beləliklə, artıq dünya çempionatı həyacanını yaşayacaq 16 komandadan sonuncusu da məlum olub. Öncəliklə qeyd edək ki, ölkəmiz bu çempionatda iştirak etməyə ev sahibi statusu almaqla avtomatik olaraq haqq qazanıb. Dünyanın bütün mədəniyyətlərinin bir araya gələcəyi çempionatda Asiyanı Şimali Koreya, Yaponiya və Çin təmsil edəcək. Bu üç ölkənin çempionatda iştirakı ötən ilin noyabr ayından artıq məlum idi. Afrika qitəsinin Qambiya, Nigeriya və Qana milli yığma komandaları ilə təmsil olunacağı çempionatda azarkeşlik mədəniyyəti, futbol coşğusu ilə tanınan Cənubi Amerikanı Braziliya, Kolumbiya və Uruqvay milli yığmaları simvolizə edəcək.
Yeni Zelandiya milli yığmasına gəldikdə isə, onlar çempionatda iştirak haqqına sahib olmaq üçün OFC seçimləri sırasında digər iştirakçı 3 ölkə arasından fərqlənməyi bacarıb və sentyabr ayında Bakı və Lənkəranda keçiriləcək oyunlarda iştirak üçün ölkəmizə təşrif buyuracaq.
Yuxarıda göstərilən ölkələrə əlavə olaraq 2-13 may tarixlərində Quatemalada baş tutan CONCACAF seçimlərində çempionatda iştirak edəcək 3 ölkə daha məlum olub. Belə ki, 10 may tarixində Amerika Birləşmiş Ştatları və Kanada, 12 may tarixində isə Meksika milli yığması digər komandalar arasından sıyrılaraq Azərbaycana bilet əldə edənlər sırasına qoşulublar.
