28 iyun 2012 18:34
Braziliya millisində oynamış futbolçu Simurqda
Hazırda Türkiyədə hazırlıqları davam etdirən "Simurq"a baxış üçün yeni futbolçular dəvət olunub. Azerisport.az xəbər verir ki, çoxdandı adı bu komandayla hallanan braziyalı yarımmüdafiəçi Ademar Aparekido Xavyer Junior artıq “sarı-qaralar”ın düşərgəsinə qoşulub.
27 yaşlı cənubi amerikalının son iş yeri Moldovanın "Milsami-Ursidos" klubudu. 2010-cu ildən bu komandada forma geyinən Ademar 45 oyunda meydana çıxıb və 15 qol vurub.
Peşəkar futbolçu karyerasına 2005-ci vətənində başlayan yarımmüdafiəçi Portuqaliyanın "Vitoria de Setubal", "Rio Ave", Bolqarıstanın "Vihren", Rumıniyanın "Gloria" və Qatemalanın "Deportivo Xinabajul" klublarının da şərəfini qoruyub. O, həmçinin 2001-2002-ci illərdə Braziliyanın U-16 yığmasına dəvət edilib.
Ademardan başqa Zaqatala təmsilçisi baxışa yeni müdafiəçidə dəvət edib. Bu xorvatiyalı futbolçu Petar Tomiçdir. 193 sm boya malik olan 30 yaşlı mərkəz müdafiəçisinin son iş yeri HNK klubudur. 2009-cu ildən bu komandada top qovan Peter Tomiç 73 oyunda forma geyinib və 3 dəfə qol vurmağı bacarıb.
Qeyd edək ki, hər iki futbolçu tibbi müayinədən keçdikdən sonra məşqlərə qoşulub. Yoldaşlıq görüşlərindən sonra baş məşqçi Georgi Çıxradze baxışa dəvət olunan futbolçular haqqında yekun qərar verəcək.
