28 iyun 2012 18:48
Pley-off mərhələsi sabah başlayır
Xəbər verdiyimiz kimi, hazırda Bakıda Azərbaycan Beynəlxalq Bankının 20 illiyinə həsr olunan beynəlxalq turnir keçirilir. Azerisport.az xəbər verir ki, dünən turnirin qrup mərhələsinə yekun vurulub.
Bu gün komandalar istirahət edir. Sabah isə turnirin pley-off mərhələsi başlayacaq. Beləliklə, sabah əvvəl saat 10:00-da 7-8-ci yerlər uğrundakı oyunda meydana Türkiyənin "Samsunspor" və Estoniyanın "Kotkas" komandaları çıxacaqlar. Saat 11:20-də isə 5-6-cı yerlər uğrundakı matç başlayacaq. Bu görüşdə "İnter" Gürcüstanın "Dinamo" kollektivi ilə üz-üzə gələcək.
Axşamkı oyunlarda isə turnirin finalçılarının adları məlum olacaq. Belə ki, saat 18:00-da baş tutacaq ilk yarımfinal oyununda Bolqarıstanın "Slaviya" və Rusiyanın "Rubin" komandaları qarşılaşacaqlar. Saat 19:20-də isə İsveçin "Brommapojkarna" və Ukraynanın "Karpatı" komandaları öz aralarında həlledici görüşə vəsiqə qazanacaq ikinci komandanın adını müəyyənləşdirəcəklər.
Qeyd edək ki, turnirin bütün oyunları "Dalğa Arena"da keçirilir.
