28 iyun 2012 00:27
Turan Premyer Liqadan imtina etdi
“Turan” futbol üzrə Azərbaycan Premyer Liqasında iştirakdan imtina edib. Azerisport.az xəbər verir ki, Tovuz klubu 2012-2013 mövsümündə elitada çıxış etməyəcəyini rəsmən bəyan edib.
Komanda uzun müddətli istirahətdən sonra hələ də bir araya gəlməyib. Bütün futbolçular Tovuzu tərk ediblər və özləri üçün başqa iş yeri axtarırlar. Bğlgə təmsilçisinin baş məşqçisi Əsgər Abdullayev də aqibətlərinin necə olacağını bilmir. Lakin o, hazırkı vəziyyəti şərh etmək də istəmir.
Klub rəhbərliyi hələ də sponsor axtarışlarını davam etdirir. Lakin bunun bəhrə verəcəyinə inam azdı. Həm də artıq “Turan”ın Peşəkar Futbol Liqasına bank zəmanətini təqdim etməsi lazımdı. Amma bundan sonra toplanacaq komandanın yeni mövsümə hazırlaşması çox çətin görünür.
İndi “Turan”ın elitada qalmayacağı halda Premyer Liqanın yeni mövsümü ilə bağlı qeyri-müəyyənliyin necə olacağı bəlli deyil. Əslində “Turan” son mövsümdə 11-ci yeri tutduğu üçün birinci diviziondan gələn “Neftçala” ilə pley-off oyunu keçirməli idi ki, elitada qalsın. Amma aşağı liqa təmsilçisinin lisenziyası olmadığından, Tovuz klubu Premyer Liqada saxlanıldı.
Birinci divizionun çempionu “Qaradağ Lökbatan”a da lisenziya verilməyib. Elə isə, görəsən, Peşəkar Futbol Liqası yeni mövsümü necə təşkil edəcək?
