29 iyun 2012 18:33
Mahmud Qurbanov: Əsas məqsədim Gəncənin adına layiq komanda yaratmaqdı
Azerisport.az xəbər verir ki, “Tərəqqi”nin baş məşqçisi Mahmud Qurbanovun müsahibəsi ilə tanış edir.
- “Tərəqqi”də işlər necədi?
- Artıq komandanı qəbul etmişəm. Futbolçularla görüşdüm. İlk tanışlıqdan sonra qarşıya qoyulan məqsədlər barədə danışdıq. Mübariz və baxımlı futbol oynamağı bacaran bir komanda yaradacağımızı bildirdim. Hələ ki bu qədər.
- Ötən mövsümdə “Tərəqqi”də çıxış etmiş futbolçularla işləmək fikriniz var?
- Hələlik bir söz deyə bilmərəm. Kollektivlə o qədər də yaxından tanış deyiləm. Yalnız bir-iki oyunun video yazısını izləmişəm. Təbii ki, toplanış zamanı onlar da məşqlərə qatılacaqlar. Yalnız bundan sonra futbolçular barədə qərar verə bilərəm.
- Bu günlərdə KİV-də “açiq qapı” ilə bağlı informasiyalar yayıldı. Bununla bağlı fikirlərinizi bilmək istərdik.
- Bəli biz rəhbərliklə qərara gəldik ki, iyulun 2-də saat 5-dən etibarən özünə güvənən və futbolçu keyfiyyətlərinə malik olan 17-23 yaş həddində olan gəncləri baxışa dəvət edək. Biz həmin müraciət edən bütün futbolçuları nəzərdən keçirəcək, onları yoxlayacaq və tələblərimizə cavab verən anda komandaya dəvət edəcəyik.
- Gəncəyə məşqçi kimi dönüşünüz futbolçu karyeranız kimi uğurlu alınacaqmı?
- Bilirsiniz bu barədə indidən danışmaq tezdi. Əsas məqsədim Gəncənin adına layiq komanda yaratmaqdı. Mübariz, intizamlı, baxımlı futbol oynamağı bacaran bir komanda. Təbii ki, növbəti mövsüm medallar uğrunda mübarizə aparmaq, premyerliqaya vəsiqə qazanmaq istəyirik. Çalışacağam ki, “Tərəqqi” qabiliyyətli və idmançı keyfiyyətlərinə malik futbolçuların yetişməsində Gəncə futboluna öz töhfəsini versin. (klubun mətbuat xidməti)
