Neftçi üçün iki Dinamo

Azərbaycan çempionu “Neftçi”  bu gün növbəti təlim-məşq toplanışını həyata keçirmək üçün Avstriyaya yola düşüb. Azerisport.az xəbər verir ki, ilk hazırlıq prosesini Türkiyədə həyata keçirən “ağ-qaralar” UEFA Çempionlar Liqasının ikinci təsnifat mərhələsində qarşılaşacağı “Zestafoni” (Gürcüstan) ilə oyunlara son hazırlıqları məhz Avstriyada həyata keçirəcək.

 

Hansı ki, Azərbaycan çempionunun rəqibi də məhz bu ölkəni özünə məskən seçib. Böyükağa Hacıyevin yetirmələri Türkiyə toplanışında daha çox fiziki hazırlığa önəm verirdisə, bu dəfə yoxlama matçları diqqət mərkəzində olacaq. “Neftçi”nin ilk rəqibi iyulun 7-də Buxarest “Dinamo”su (Rumıniya) olacaq. Bundan üç gün sonra Azərbaycan çempionu daha bir “Dinamo” ilə görüşəcək. Bu dəfəki rəqib isə ötən il ÇL-də “ağ-qaralar”ın yolunu kəsmiş zaqreblilər – Xorvatiya çempionu olacaq.

 

“Neftçi”nin üçüncü rəqibinin kimliyinə, eləcə də oyunun keçirilmə vaxtına Avstriyada aydınlıq gələcək. Komandamız vətənə iyulun 11-də qayıdacaq.

Xatırladaq ki, “Neftçi” Türkiyə toplanışı vaxtı Rusiya “Mordoviya”sına 0:4 hesabıyla uduzmuş, İran çempionu “Sepahan”ı 1:0 yenmişdi.