Mübariz Mənsimov XL-dan Avroliqada uğurlu nəticə gözləyir

Bu gün "Xəzər Lənkəran"ın fəxri prezidenti Mübariz Mənsimov Lənkəranda komandanın baş məşqçisi Yunis Hüseynov və onun məşqçi korpusu ilə görüş keçirib. Azerisport.az xəbər verir ki, görüşdə klubun prezidenti Mais Mənsimov və vitse-prezident Tuyqun Nadirov da iştirak ediblər.

 

Mənsimov komandanın qarşıdan gələn Avropa Liqası oyunlarına hazırlığı barədə maraqlanaraq, məsul görüşlər öncəsi oyunçuların fiziki və psixoloji durumu barədə baş məşqçinin hesabatını dinləyib. Klubun fəxri prezidenti klub rəhbərliyi və şəxsən onun tərəfindən komandaya lazım olan bütün dəstəyin verildiyinə zəmanət verməklə, komandadan layiqli və uğurlu nəticəni gözlədiyini və bu nəticənin qazanılacağına inamını bildirib.

 

"Xəzər Lənkəran"ın fəxri prezidentinə komandanın hazırlığı barədə ətraflı məlumat verən baş məşqçi Yunis Hüseynov da öz növbəsində uğurlu nəticənin qazanılması üçün komandanın özünün bütün gücünü maksimal şəkildə və faydalı məcrada istifadə edəcəyinə söz verib. Baş məşqçi və onun köməkçiləri Mənsimova komandaya göstərdiyi diqqətə görə təşəkkürlərini bildirərək, bu görüşün komandadaxili əhval-ruhiyyəyə olduqca müsbət təsir edəcəyinə əminliklərini bildiriblər.