2 iyul 2012 17:25
Sumqayıt da növbəti mövsümün hazırlığına start verdi
“Sumqayıt” Futbol Klubu 2012/2013 mövsümü üçün hazırlığa start verib. Azerisport.az xəbər verir ki, Bernard Raabın rəhbərlik etdiyi komanda bu gün “Dalğa Arena”da ilk məşqinə çıxıb.
Yeni transferlər –Aftandil Hacıyev, Emin Cəfərquliyev, Sabir Allahquliyev, Ceyhun Sultanov, Fərid Quliyev, Məhəmməd Əli Atam, Səlahət Ağayev və Elçin Sadıqov da məşqdə iştirak edib. Əvəzedicilərdən əsas komandaya dəvət olunan Aydın Qasımov, Arif Vəliyev, Bəxtiyar Həsənəlizadə, Ayaz Mehdiyev və Aqşin Muxtaroğlu da Raabın sərəncamında olub.
“Sumqayıt” sabahdan etibarən hazırlığını gündə iki dəfə olmaqla Mehdi Hüseynzadə adına Sumqayıt şəhər stadionunda davam etdirəcək. Sabah səhər məşqi saat 10:00-da baş tutacaq.
Qeyd edək ki, hazırda U-19-un heyətində təlim-məşq toplanışında olan Orxan Əliyev, Ruslan Nəsirli və Şamil Cəmaləddinov isə hazırlıq prosesinə nisbətən gec qoşulacaq.
