2 iyul 2012 22:01
Mahmud Qurbanov: Biz onları taparaq üzə çıxarmalıyıq
Bu gün Gəncənin “Tərəqqi” futbol klubunun elan etdiyi “açıq qapı” baş tutub. Bu barədə azerisport.az saytına klubun mətbuat xidməti məlumat verib.
Məlumata görə, komandanın baş məşqçisi Mahmud Qurbanov qərb bölgəsindən baxışa gələn təxminən 30-a yaxın gənci sınaqdan keçirib.
“Hələlik bir dəfə məşqlə nəsə söyləmək olmaz. Məşqə qatılan uşaqların arasında futbol bacarığı olanlar var. Yəqin ki, bu gəncləri növbəti məşqlərə də dəvət edəcəyik. Yalnız bundan sonra onlar haqqında nə isə bir fikir söyləmək olar. Lakin mən “açıq qapı” prinsipinin nəticəsini görəcəyimizə inanıram. Bu regiondan həmişə güclü futbolçular yetişib. Mən ümidvaram ki, bu gün də belə gənclər var və biz onları taparaq üzə çıxarmalıyıq” - deyə “Tərəqqi”nin gənc və perspektivli məşqçisi əlavə edib.
Məlumat üçün bildirək ki, bu gündən etibarən “Tərəqqi” növbəti mövsümün hazırlıqlarına start verib.
