4 iyul 2012 01:38
Çempionlar Liqasının yeni mövsümü 2 darmadağınla başladı (YENİLƏNİB)
Futbol üzrə UEFA Çempionlar Liqasında 2012-2013 mövsümünə start verilib. Azerisport.az xəbər verir ki, qitənin ən nüfuzlu klub turnirinin ilkin təsnifat mərhələsində cəmi altı klub mübarizə aparır.
Cırtdan ölkə təmsilçiləri ikinci təsnifat mərhələsinə adlayacaq ən güclü üç klubun adına aydınlıq gətirməlidilər. Hər üç görüş eyni gündə baş tutub. Maraqlıdı ki, ÇL-in yeni mövsümü böyükhesablı darmadağınlarla başlayıb. Belə ki, "Dudelange" doğma meydanda "Tre Penne"yə 7, "Valletta" isə "Lusitanos"a 8 cavabsız qol vurub. Günün digər görüşü isə qolsuz başa çatıb.
Maraq üçün bildirək ki, Azərbaycanı ÇL-in yeni mövsümündə ölkə çempionu “Neftçi” təmsil edəcək. “Ağ-qaralar” mübarizəyə ikinci təsnifat mərhələsindən qoşulacaq və Gürcüstan çempionu “Zestafoni” ilə qarşılaşacaq. Həmin görüşlər iyulun 17-də və 24-də keçiriləcək.
Çempionlar Liqası
1-ci təsnifat mərhələsi (ilk oyunlar)
3 iyul
Dudelange (Lüksemburq) - Tre Penne (San Marino) - 7:0 (2:0)
Qollar: Melisse, 25, Benzouye, 29; 54, Leqros, 47, Yoahim, 52; 90+3, D`Orsi, 78-öz qapısına.
Valletta (Malta) - Lusitanos (Andorra) - 8:0 (6:0)
Qollar: Çaruana, 4, Mifsud, 10; 18; 45; 70, Conatan, 17; 23, Aqyus, 73.
Linfield (Şimali İrlandiya) – Torshavn (Farer adaları) - 0:0 (0:0)
Matçın 39-cu dəqiqəsində meydan sahiblərinin heyətində Tompson penaltidən yararlana bilməyib
Qeyd edək ki, birinci təsnifat mərhələsinin cavab oyunları iyulun 10-da keçiriləcək.
