3 iyul 2012 00:23
Neftçinin rəqibi Bolqarıstan klubuna qalib gəldi
Futbol üzrə UEFA Çempionlar Liqasının ikinci təsnifat mərhələsi çərçivəsində “Neftçi”nin rəqibi olan Gürcüstanın “Zestafoni” komandası yoxlama matçı keçirib. Azerisport.az xəbər verir ki, Avstriyada təlim-məşq toplanışında olan gürcülər Bolqarıstan təmsilçisi “Lokomotiv” (Plovdiv) ilə görüşdə qüvvələrini sınayıblar.
Qarşılaşma Gürcüstan çempionunun 3:2 hesablı qələbəsi ilə yekunlaşıb. Hesabı 10-cu dəqiqədə gürcülərin aparıcı hücumçusu Dvali açıb. Lakin cəmi 3 dəqiqə sonra bolqarlar tarazlığı bərpa ediblər. Fasilədən sonra (55-ci dəqiqəq) Dvali özünün və komandasının ikinci qolunu vurub. 77-ci dəqiqədə Babunaşvili gürcülərin üstünlüyünü bir qədər də artırıb. Plovdiv klubu yalnız görüşün sonuna 9 dəqiqə qalmış buraxılan qollardan birinin əvəzini çıxa bilsə də, artığını bacarmayıb.
Qeyd edək ki, bu, “Neftçi”nin rəqibinin ölkə xaricindəki toplanış çərçivəsindəki ikinci sınaq matçı idi. Bundan öncə Rumıniya təmsilçisi “Astra” ilə görüşdə qüvvəsini sınayan Gürcüstan çempionu 0:1 hesablı məğlubiyyətlə üzləşmişdi. “Zestafoni” növbəti matçını iyulun 7-də “Steaua”ya (Rumıniya) qarşı keçirəcək.
Sonda onu da bildirək ki, “Neftçi” ilə “Zestafoni” arasındakı ilk oyun iyulun 17-də “Dalğa Arena”da keçiriləcək və yerli vaxtla saat 21:00-da başlayacaq. Cavab görüşü isə bir həftə sonra Zestafonidə baş tutacaq.
