4 iyul 2012 13:32
Azərbaycan yığması FİFA reytinqində irəlilədi
FİFA milli komandaların növbəti reytinq cədvəlini açıqlayıb. Azerisport.az xəbər verir ki, Berti Foqtsun çalışdırdığı Azərbaycan millisi ötən ayla müqayisədə 4 pillə irəliləyib.
Belə ki, Azərbaycan milli komandası hazırda 108-ci pillədə qərarlaşıb. Yığmamızın hesabında 308 reytinq xalı var.
Yığmamızın DÇ-2014-ün seçmə mərhələsindəki rəqiblərindən Portuqaliya yığması 5 pillə irəliləyib. AÇ-2012-nin yarımfinalına yüksələn portuqaliyalılar hazırda 1213 xalla 5-ci pillədə qərarlaşıblar. Rusiya yığması mövqeyini qoruyub (13-cü yer, 981 xal), İsrail 1 pillə geriləyib (82-ci yer, 427 xal), Şimali İrlandiya 1 pillə irəliləyib (102-ci yer, 336 xal). Ən böyük irəliləyiş isə Lüksemburqa məxsusdu. “Cırtdan ölkə” yığması 11 pillə irəliləyərək 303 xalla 110-cu olub.
İlk onluqda bəzi yerdəyişmələr var. Avropa çempionatının qalibi İspaniya 1-ci pillədəki mövqeyini qoruyub (1691 xal). AÇ-2012-nin yarımfinalında uduzan Almaniya 2-ci pilləyə yüksəlib (1502 xal). Əvəzində 2-ci pillədəki Uruqvay 3-cü yerə düşüb (1297 xal). Bundan başqa ilk onluqda İngiltərə (2 pillə irəliləyib), Portuqaliya (5 pillə irəliləyib), İtaliya (6 pillə irəliləyib), Argentina, Hollandiya (4 pillə geriləyib), Xorvatiya (1 pillə geriləyib) və Danimarka (1 pillə geriləyib) qərarlaşıb. Braziliya millisi 6 pillə geriləyərək onluğu tərk edib. Onları AÇ-2012-nin finalçısı İtaliya əvəzləyib.
Növbəti reytinq cədvəli avqustun 8-də açıqlanacaq.
