4 iyul 2012 15:53
Mura viza probleminə görə Bakıya gələ bilmir
Sloveniyanın “Mura” klubu ciddi problemlə üzləşib. Azerisport.az xəbər verir ki, komandanın oyunçuları və məşqçi heyəti hələ də Bakıya gəlməyib.
Halbuki, bu komanda artıq sabah Avropa Liqasının birinci təsnifat mərhələsi çərçivəsində “Bakı”nın qonağı olmalıdı.
Sloveniyalılar Azərbaycan paytaxtına bu gün gəlməli idilər. Hətta onların bir neçə saat öncə “Dalğa Arena”da məşqə çıxması planlaşdırılmışdı. Amma Sloveniya klubu üzləşdiyi viza problemi səbəbindən ölkədən çıxa bilmir.
Klub rəhbərliyi püşkatmadan dərhal sonra Azərbaycanın Avstriyadakı səfirliyinə müraciət edərək, viza istəyib. Amma onlar bu vizanı hələ də ala bilməyiblər. Bu üzdən də məsələyə “Bakı” rəsmiləri qarışıblar. Onlar bu barədə UEFA nümayəndəsinə də məlumat veriblər. Azərbaycanın müvafiq dövlət qurumlarının məsələyə müdaxiləsindən sonra “Mura”nın problemi yoluna qoyulub. Belə ki, komanda üzvlərinə həmin vizanı birbaşa “Heydər Əliyev” aeroportunda ala bilmək imkanı yaradılıb. Bu barədə məlumatı “Bakı”nın icraçı direktoru Yaşar Seyidov verib.
Lakin bu məsələ də həllini tapmasına rəğmən, “Mura”nın başqa problemi çıxıb. Komanda öncə Bakıya Lyublyana-Zaqrev-İstanbul-Bakı reysi ilə gəlməli idi. İndi isə onlar çarter reysi sifariş verməli olublar. Belə olan halda komanda Bakıya yalnız gecə saatlarında təşrif buyuracaq və “Dalğa Arena”da oyun öncəsi məşq edə bilməyəcək. Böyük ehtimalla Sloveniya təmsilçisinin nümayəndələri mətbuat önünə də çıxa bilməyəcəklər.
Qeyd edək ki, “Bakı” – “Mura” görüşü sabah “Dalğa Arena”da keçiriləcək və saat 21:00-da başlayacaq.
