4 iyul 2012 19:27
Sloveniya Futbol Federasiyası Muranın səhvini etiraf etdi
Sloveniya Futbol Federasiyası “Bakı” rəhbərliyinə minnətdarlığını çatdırıb. Azerisport.az xəbər verir ki, onlar bu ölkəni Avropa Liqasında təmsil edən “Mura” klubunun Azərbaycana gəlmək üçün viza probleminin həll olunmasında “zolaqlılar”ın xidmətini diqqətdən kənarda qoymayıblar.
Federasiya rəhbərliyi öz növbəsində “Mura”nın səhvə yol verdiyini etiraf edib. Belə ki, sözügedən klubun rəhbərliyi vaxtında Azərbaycanın Avstriyadakı səfirliyinə müraciət etmədiyi üçün futbolçular və məşqçilər hələ də ölkəmizə gəlib çıxa bilməyiblər. Halbuki, sabah “Bakı” ilə qarşılaşmalı olan komanda bu gün “Dalğa Arena”da məşqə çıxmalı, jurnalistlər üçün mətbuat konfransı keçirilməliydi.
Amma məsələyə “Bakı” və AFFA rəhbərliyi qarışdıqdan sonra sloveniyalıların viza problemi yoluna qoyulub. Komanda bu gecə saat 2:00 radələrində Bakıya çatması gözlənilir.
