5 iyul 2012 14:53
Denis İvanov: Bakıda qapı xətti ilə bağlı problem olduğunu düşünmürəm
“Bakı”nın müdafiəçisi Denis İvanov azerisport.az saytına müsahibəsində Avropa Liqasının birinci təsnifat mərhələsində üz-üzə gələcəkləri Sloveniya “Mura”sı ilə oyundakı şanslarından danışıb.
“Mura” ilə yoxlama oyununu Avroliqa matçı ilə eyniləşdirmək olmaz. Bu dəfə biz tamamilə fərqli komanda, daha güclü mübarizənin şahidi olacağıq. Bilirik ki, həmin oyunda heç də əsas heyətlə oynamırdılar. Odu ki, Bakıdakı oyun tamamilə fərqli olacaq. 4:0 hesabıyla qələbə qazandığımız oyunda isə onların heyətində daha çox əvəzedicilər çıxış edirdilər. Daha sonra bizim məşqçilərimiz onların digər sınaq matçlarına da baxmışdı. Məhz bu zaman tamam fərqli komanda gördüklərini deyirlər. Buna görə heç həmin qələbə barədə düşünməyimizə də dəyməz”.
İvanov “Bakı”nın qapıçı problemini yola qoya bilməməsinə də münasibət bildirib: “Düzünü deyim ki, mən heç qapı xətti ilə bağlı problem olduğunu düşünmürəm. Aqil əla qapıçıdı. Ona görə də narahat olmağa dəyməz. Hər şey yaxşı olacaq. Qapıçımız buna ümid verir”.
Qeyd edək ki, Aqil Məmmədovun ümidinə qalan “Bakı” son anda qapıçılarla işləyən məşqçi Xalidu Sissokonu da sifariş etmək məcburiyyətində qalıb.
Təcrübəli müdafiəçi rəqib komandanın viza probleminə görə Bakıya gec gəlməsinin də özləri üçün əlavə şans yaratdığını düşünmür: “Baxarıq. Hər şeyi oyun göstərəcək”.
