7 iyul 2012 13:06
İtaliya futbolunun əfsanəsi Kanada klubunda
İtaliya futbolunun canlı əfsanələrindən olan Alessandro Nesta özünə yeni klub tapıb. Azerisport.az xəbər verir ki, mövsüm başa çatan kimi uzun illər şərəfini qoruduğu “Milan”la yollarını ayıran təcrübəli müdafiəçi bundan sonrakı karyerasını Kanadada davam etdirəcək.
Belə ki, o, vaxtilə “Lazio”da birgə çıxış etdiyi digər həmyerlisinin - Marko di Vayonun da forma geydiyi “Montreal Impact” klubu ilə anlaşıb. İtaliya yığmasının sabiq üzvü yeni klubu ilə 1 illik müqavilə imzalayıb.
Qeyd edək ki, Nestanın klub karyerası indiyə qədər sadəcə iki komandadan ibarət idi. O, 1993–2002-ci illər aralığında çıxış etdiyi “Lazio”da 193 oyunda meydana çıxmış, 1 qola imza atmışdı. 2002–2012-ci illər aralığında isə “Milan”da top qovan müdafiəçi 224 oyun keçirmiş, 7 qol vurmuşdu. Nesta İtaliyanın əsas yığmasında da 78 oyun keçirib.
