Xəzər Lənkəran Tallində tarix yazdı (YENİLƏNİB)

Bu gün Avropa Liqasının birinci təsnifat mərhələsinin cavab oyunlarına start verilib. Azerisport.az xəbər verir ki, Azərbaycanı bu turnirdə təmsil edən “Xəzər Lənkəran” da Estoniya “Nomme Kalju”su ilə cavab oyununa məhz bu gün çıxıb.

 

Qeyd edək ki, əslində Avroliqanın ilk təsnifat mərhələsinin cavab oyunları iyulun 12-də keçirilməlidi. Lakin Estoniyada hazırda 19 yaşadək futbolçulardan ibarət yığmalar arasında Avropa çempionatı keçirildiyindən, bu görüş iki gün öncəyə çəkilmişdi.

 

Bu oyuna qədər avrokuboklarda bir dəfə də mərhələ adlaya bilməyən “ağ-yaşıllar” eyni zamanda qələbə üzünə də həsrət idilər. Yunis Hüseynovun rəhbərliyi altında ilk dəfə qitə miqyaslı yarışlarda qüvvəsini sınayan cənub təmsilçisi Lənkəranda tarix yazmaq istəyinə çata bilməmişdi. Amma bütün bu uğursuzluqlara Tallində son qoymaq şansı qalmaqda idi. komandamız ikinci təsnifat mərhələsinə adlamaq üçün bu görüşdə mütləq qələbə qazanmalı, ya da 3:3 və ya daha böyük hesablı heç-heçəyə nail olmalıydı.

 

Amma "Xəzər Lənkəran" məhz qələbə qazanmaqla böyük bir zəfərə imza atdı. Avrokuboklardakı ilk qələbəsini qazanan komanda həm də ilk dəfə mərhələ keçməyə nail oldu. Görünür, bu tarix məhz Tallində yazılmalı imiş.

 

Sonda onu da bildirək ki, bu cütün qalibini ikinci təsnifat mərhələsində "Lech" (Polşa) - "Jetisu" (Qazaxıstan) cütünün qalibi ilə görüş gözləyir. Bu komandaların ilk oyununda polşalılar üstün olublar. Ayın 12-də keçiriləcək cavab matçından sonra böyük ehtimalla "Xəzər Lənkəran"a məhz "Lech" rəqib olacaq. Hansı ki, təmsilçimiz artıq əvvəlki illərdə bir dəfə bu komanda ilə üz-üzə gəlib və uğursuzluqla üzləşib.

Avropa Liqası

1-ci təsnifat mərhələsi (cavab oyunu)

10 iyul

 

NOMME KALJU - XƏZƏR LƏNKƏRAN - 0:2 (0:1)

Qollar: R.Abışov, 40 (0:1), B.Subaşiç, 86 (0:2)

Tallin. Kadriorq stadionu.

Hakimlər: Daq Vidar Hafsas, Sveyn İnge Uiken, Yan Erik Engan, Trond İvar Dovl (hamısı Norveç).

Hakim-inspektor: Yonas Braqa (Litva)

UEFA nümayəndəsi: İonel Piskanu (Rumıniya).

İlk oyun – 2:2

 

NOMME KALJU: 1. Vitali Teleş, 5. Alo Barenqrub (k), 6. Xorxe Rodriqes, 7. Eyno Puri, 8. Yankuba Sisey, 9. Damiano Kvinteri, 10. Oliver Konsa, 11. Kristen Vikmae, 14. Ken Kallaste, 75. Hidetoşi Vakui, 77. Tihon Şişov.

Ehtiyat oyunçular: 96. Kaydo Koppel, 2. Marko Byanki, 3. Andre Kooqas, 15. Yuri Edvokimov, 16. Tanel Melts, 18. Sergey Terexov, 23. Hideaki Takeda.

XƏZƏR LƏNKƏRAN: 1. Kamran Ağayev, 5. Elnur Alllahverdiyev, 6. Robert Alviz, 15. Ruslan Abışov, 7. Sadio Tounkara, 8. Eder Bonfim, 21. Radomir Todorov, 14. Rahid Əmirquliyev (k), 16. Adrian Pit, 27. Adrian Skarlatake, Branimir Subaşiç.

Ehtiyat oyunçular: 85. Kamal Bayramov, 4. Akif Tağıyev, 10. Elnur Abdullayev, 11. Rendal Brenes, 18. Alim Qurbanov, 42. Kamran Abdullazadə, 81. Rikardo Qomes.

 

Oyun başladı

2. XL ilk hücumunu qurmağa çalışsa da, alınmır

4. Meydan sahiblərinin cərimə zərbəsi uğursuz alınır

5. Oyunu XL-ın fəxri prezidenti Mübariz Mənsimov da stadiondan izləyir

6. Alviz qaydanı pozur

8. Subaşiçin cərimə zərbəsi kornerlə nəticələnir

11. Subaşiçin zərbəsi zamanı Teleş qapısını qoldan xilas edir

13. NK ardıcıl üç künc zərbəsi yerinə yetirir. Kamran çıxışda əla oynayır!

18. Siseyin zərbəsi qapıdan aralı keçir

20. Oyunun tempi çox aşağı düşüb

21. XL cərimə zərbəsi qazanır. Lakin bu, qol gətirmir

22. X.Rodriqes sarı vərəqə ilə cəzalandırılır. O, sürətli əks-hücumun qarşısını alır

25. NK yenə ağıllı oynayır, komandamızı cərimə meydançasına demək olar ki, buraxmır

30. Geridə qalan yarım saat ərzində komandamız heç bir təhlükəli qol vəziyyəti yarada bilməyib

31. NK kornerdən fərqlənə bilmir

32. Əmirquliyev həkim yardımına ehtiyac duysa da, oyuna davam edə biləcək

32. Meydan sahiblərinin çox təhlükəli hücumu zamanı komandamızın bəxti gətirir: rəqib futbolçulardan heç biri təhlükəli asmaya toxuna bilmir

34. Pitin kornerdən ötürməsini qapıya göndərən tapılmır

34. Lənkəranlılar bu epizodda rəqib futbolçunun əllə oynadığını iddia etsələr də, hakimi inandıra bilmirlər

37. Pitin çox təhlükəli zərbəsini Teleş kornerə çıxarır

38. Yenə Pit, yenə korner, yenə uğursuz sonluq...

40. XL hissənin sonlarında təzyiqi artırıb

40. Sisey qaydanı pozur. Komandamız cərimə zərbəsi vuracaq

40. QOOOOOOOOOOOOL! Pitin ötürməsini Abışov başla tora qovuşdurur - 0:1

43. Tounkara sarı vərəqə alır

45. İlk yarıya 1 dəqiqə əlavə olunur

Birinci hissə başa çatdı

Bu hesab "Xəzər Lənkəran"ı növbəti mərhələyə çıxarır. Lakin komandamız hər ehtimala qarşı daha bir qol vurmağa borcludu. Təbii ki, müdafiədə diqqətli olmaq şərti ilə

İkinci hissə başladı

48. Konsanın cərimə zərbəsi zamanı Barenburqun hesabı bərabərləşdirməsinə Kamran mane olur. Təhlükəli baş zərbəsi idi

49. Meydan sahibləri korner zamanı da istəklərinə nail ola bilmirlər

50. Fasilədən sonra NK fəaldı. Bu da başadüşüləndi

51. Pitin təhlükəli cərimə zərbəsi zamanı Teleş komandasını qoldan xilas edir

52. Subaşiçin zərbəsi qapıdan yan keçir

53. Branimir daha bir qeyri-dəqiq zərbə ilə yadda qalır

57. NK yüz faizli qol epizodu yaradır: Ruslan çox təhlükəli hücumun qarşısını alır və özü də zədələnir

58. NK daha bir korner qazanır

59. Kvinteri sarı vərəqə ilə cəzalanır

60. Meydan sahibləri getdikcə daha çox boşluqlar buraxmağa başlayır. XL bundan istifadə etməlidi

61. XL kornerdən yaxşı yararlana bilmir

64. Pitin cərimə zərbəsindən ötürməsini Abışov qapıya göndərə bilmir

65. NK yenə ardıcıl üç korner yerinə yetirir

67. Alvizin zərbəsini Teleş qaytarır

71. Konsa daha bir cərimə zərbəsi yerinə yetirir: yenə Barenqrubun qol vurmaq arzusu gözündə qalır. Amma çox təhlükəli epizod idi

74. Pitin yerinə yetirdiyi cərimə zərbəsi zamanı Tounkara çərçivəni nişan ala bilmir

79. Subaşiçin zərbəsi yenə hədəfdən yan keçir

80. NK daha bir korneri boşa verir

80. Rəqib komandada Purini Evdokimov əvəzləyir

81. Konsanın kornerdən ötürməsi zamanı Kallaste qapıya düşə bilmir

82. Kallastenin qapıya növbəti zərbəsi hədəfdən yan keçir

83. Pitin cərimə zərbəsi kornerlə nəticələnir

84. Tounkaranın əvəzində meydana R.Brenes çıxır

84. Təmsilçimiz kornerdən yaxşı yararlana bilmir

86. QOOOOOOOOOOOOOOOOOOOOOOOOOOOL!!!! Subaşiç Brenesin ötürməsini tora qovuşdurur! - 0:2

87. NK ardıcıl iki korner yerinə yetirir: bəhrəsiz qalır

88. Kvinteri qol vursa da, ofsaydda olduğu bildirilir

88. Subaşiç yerini R.Qomesə verir

90. Kallaste cərimə zərbəsini dəqiq yerinə yetirə bilmir

90. Matçın əsas vaxtına 3 dəqiqə əlavə olunur

90+2. Pitin əvəzində meydana E.Abdullayev çıxır

Matç başa çatdı