9 iyul 2012 14:15
Mundialın təşkilatçıları Bakının bazasında (FOTO)
FIFA U-17 qadınlararası dünya çempionatının yerli təşkilat komitəsi iştirakçı komandalarının nümayəndələri üçün "Bakı" futbol klubunun bazası ilə tanışlıq xarakterli ziyarət təşkil edib. Azerisport.az xəbər verir ki, FIFA U-17 qadınlararası dünya çempionatı 2012-ci ilin sentyabr-oktyabr aylarında Azərbaycanda baş tutacaq.
16 komandanın iştirakı ilə keçiriləcək dünya çempionatını Bakı və Lənkəran şəhərləri qəbul edir. Paytaxtın 3 və cənub şəhərinin mərkəzi arenası oyunlar üçün nəzərdə tutulub.
"Bakı" futbol klubunun təlim-məşq bazası da komandaların ixtiyarına veriləcək. Dünya çempionatının iştirakçı komandaları klubun bazasında məşq edəcəklər. 16 komanda nümayəndələrinin səfəri baza ilə yaxından tanış olmaq, infrastruktur və aparılan işləri yerində izləmək məqsədi daşıyırdı.
"Bakı" futbol klubunun bazasını gəzib-dolaşan nümayəndələr klub infrastrukturunu ən yüksək qiymətə layiq görüblər. FIFA U-17 qadınlararası dünya çempionatının iştirakçı komandalarının təmsilçiləri burada gördüklərindən məmnun qaldıqlarını, bazanın ən müasir tələblərə cavab verən dünya səviyyəli idman kompleksi kimi dəyərləndiriblər.
