11 iyul 2012 01:19
210 dəqiqəyə qol vura bilməyən komandaların taleyini penaltilər müəyyənləşdirdi (YENİLƏNİB)
Bu gün futbol üzrə UEFA Çempionlar Liqasında birinci təsnifat mərhələsinin cavab oyunlarına yekun vurulub. Azerisport.az xəbər verir ki, qitənin ən nüfuzlu klub turnirinin ilkin təsnifat mərhələsində cəmi altı klub mübarizə aparırdı.
Cırtdan ölkə təmsilçiləri ikinci təsnifat mərhələsinə adlayacaq ən güclü üç klubun adına aydınlıq gətirməliydilər. Hər üç görüş eyni gündə baş tutub. Maraq üçün xatırladaq ki, artıq iki cütdə növbəti mərhələyə kimin adlayacağı elə ilk görüşlərdən sonra məlum idi. Belə ki, "Dudelange" doğma meydanda keçirilən ilk oyunda "Tre Penne"yə 7, "Valletta" isə "Lusitanos"a 8 cavabsız qol vurmuşdu. Ona görə də, bu komandalar arasındakı cavab matçında heç bir möcüzə gözlənilmirdi. İlk oyundan qolsuz ayrılan “Torshavn”la “Linfield”in duelinin necə başa çatacağı isə maraqla gözlənilirdi. Nə qədər qəribə olsa da, cavab matçında da 90 dəqiqə qolsuz tamamlandı. Hələ üstəlik əlavə vaxtda da qalibi müəyyənləşdirə bilməyən tərəflər penalti zərbələrinə müraciət etməli oldular. Bu zərbələri daha dəqiq yerinə yetirən irlandlar növbəti mərhələyə yüksəlməyə nail oldular.
Maraq üçün bildirək ki, “Dudelange” ikinci təsnifat mərhələsində “Salzburg”la (Avstriya), “Valletta” Serbiya “Partizan”ıyla, “Linfield” isə AEL (Kipr) ilə qarşılaşacaq.
Azərbaycanı isə ÇL-in yeni mövsümündə ölkə çempionu “Neftçi” təmsil edəcək. “Ağ-qaralar” mübarizəyə ikinci təsnifat mərhələsindən qoşulacaq və Gürcüstan çempionu “Zestafoni” ilə qarşılaşacaq. Həmin görüşlər iyulun 17-də və 24-də keçiriləcək.
Çempionlar Liqası
1-ci təsnifat mərhələsi (ilk oyunlar)
10 iyul
Torshavn (Farer adaları) - Linfield (Şimali İrlandiya) - 0:0 (penaltilərlə 3:4) (0:0)
Lusitanos (Andorra) - Valletta (Malta) - 0:1 (0:8)
Qol: Conatan, 16.
Tre Penne (San Marino) - Dudelange (Lüksemburq) - 0:4 (0:7)
Qollar: Yoahim, 29; 34, Benzouyen, 41, Qomes, 45+1.
