9 iyul 2012 20:04
İnterin hazırlıq planı açıqlandı
Ötən mövsümü turnir cədvəlinin 3-cü pilləsində başa vuran “İnter”in əvəzedici komandası iyunun 11-dən etibarən növbəti mövsümə hazırlaşmağa başlayıb. Azerisport.az xəbər verir ki, iyunun 11-dən 23-dək Tofiq Mustafayevin yetirmələri Bakıda məşq ediblər.
Mustafayev komandasının hazırlıqları barədə klubun rəsmi saytına danışıb: “11-23 iyun tarixlərində Bakıda təlim-məşq toplanışı keçirdik. Bu müddət ərzində istər “İnter”in Uşaq Gənclər Futbol Məktəbindən, istərsə digər klublardan təqribən 30 yeni futbolçu baxışda oldu. Zabrat stadionunda da, dəniz sahilində də məşq etdik”.
İyunun 23-dən iyulun 2-dək “İnter”in əvəzedici heyəti Qusarda təlim-məşq toplanışı keçirdi. 10 gün davam etmiş toplanış özündə fiziki məşğələləri və Tofiq Mustafayevin komandasının 2:0 hesablı qələbəsilə başa çatmış birinci liqanın nümayəndəsi olan yerli “Şahdağ” komandasıyla keçirilən bir yoxlama qarşılaşmasını ehtiva edib.
Bakıya qayıtdıqdan sonra iyulun 5-də yenidən bir araya gələn “İnter” məşq prosesini bərpa edib və toplanış ayın 13-dək davam edəcək. Qeyd edək ki, iyulun 11-də “İnter” birinci liqanın nümayəndəsi olan “Neftçala” komandasıyla yoxlama matçı keçirəcək.
İyulun 13-də son təlim-məşq toplanışını keçirmək məqsədilə “İnter” yenidən Qusara yollanacaq. Mustafayev: “Qusara getməyi və yeni mövsümə hazırlığımızı başa vurmağı planlaşdırırıq. Bu toplanışda taktiki məsələlərə daha çox diqqət ayıracağıq. Bununla da yeni mövsümə hazırlığımızı yekunlaşdıracağıq”.
