9 iyul 2012 11:45
Bakı mərhələ adlasa, İnter Asterasla ilk oyununu səfərdə keçirəcək
Məlum olduğu kimi, Avropa Liqasındakı təmsilçimiz “İnter” mərhələ keçəcəyi halda Yunanıstanın “Asteras” klubu ilə mübarizə aparacaq. Azerisport.az xəbər verir ki, mübarizəyə birbaşa ikinci təsnifat mərhələsindən başlayacaq yunanlar püşkatmaya əsasən ilk oyunlarını da səfərdə keçirməlidilər.
Lakin “İnter” “Asteras”la ilk oyunu səfərdə də keçirə bilər. Məlum olduğu kimi, bu komanda birinci təsnifat mərhələsində Estoniya “Trans”ını demək olar ki, mübarizədən kənarlaşdırıb. İlk oyunda 5:0 hesablı qələbə qazanan “bankirlər” cavab görüşünü formallığa çevirib. İndi “İnter” özü ilə yanaşı “Bakı” və “Xəzər Lənkəran”ın da mərhələ keçməsini arzulayır. Belə ki, “zolaqlılar” Sloveniya “Mura”sını mübarizədən kənarlaşdırsa, növbəti mərhələdə Bolqarıstanın CSKA (Sofiya) klubuna, “ağ-yaşıllar” isə Estoniya “Nomme Kalju”sunu yenməyi bacarsa, böyük ehtimalla Polşanın “Lech” klubuna rəqib olacaq. Maraqlıdı ki, püşkə əsasən “Bakı” ilə CSKA, elə “Xəzər Lənkəran”la “Lexh” arasındakı ilk oyun da Azərbaycanda keçirilməlidi. Belə olan halda UEFA yenə yerdəyişmə etmək məcburiyyətində qalacaq. Çünki bir ölkənin bütün klublarının eyni gündə evdə oynamasına imkan verilmir.
Maraq üçün xatırladaq ki, Avroliqanın birinci təsnifat mərhələsində də bütün klublarımız ilk oyunlarını evdə keçirməli idilər. Amma son anda UEFA “İnter”in ilk oyununu səfərdə keçirməsinə qərar vermişdi. Elə bu dəfə də belə bir dəyişikliyin baş verəcəyi dəqiqdi.
