10 iyul 2012 12:35
Bakının viza ala bilməyən futbolçuları da Sloveniyaya getdi
Xəbər verdiyimiz kimi, Latviyanın Azərbaycandakı səfirliyi “Bakı”nın 2 futbolçusuna Sloveniyaya “Mura” ilə Avropa Liqasının I təsnifat mərhələsinin cavab oyununa yollanmaları üçün viza verməmişdi. Azerisport.az xəbər verir ki, həmin futbolçular seneqallı qapıçı Xalidu Sissoko ilə yeni transfer Georgi Popxadze idi.
Lakin “Bakı” bu futbolçuları da Sloveniyaya aparmağa nail olub. Belə ki, “Mura” rəhbərliyi bizimkiləri əmin edib ki, həmin oyunçulara viza aeroportda veriləcək.
Maraq üçün xatırladaq ki, “Mura” da Bakıya gələrkən oxşar problemlərlə üzləşmişdi. Amma onlar bütün komanda üzvlərinə viza ala bilməmişdilər. Məsələyə qarışan “Bakı” rəhbərliyi problemi ölkəmizdə yoluna qoymuşdular.
Qeyd edək ki, “Mura” – “Bakı” matçı iyulun 12-də olacaq. “Bakı” səfərə bu gün - iyulun 10-da çıxıb.
