11 iyul 2012 01:45
Slovan Neftçiyə Zestafonini məğlub etməyin yolunu göstərdi
Futbol üzrə UEFA Çempionlar Liqasının ikinci təsnifat mərhələsi çərçivəsində “Neftçi”nin rəqibi olan Gürcüstanın “Zestafoni” komandası yoxlama matçı keçirib. Azerisport.az xəbər verir ki, Avstriyada təlim-məşq toplanışında olan gürcülər Çexiya təmsilçisi “Slovan”la görüşdə qüvvələrini sınayıblar.
Qarşılaşma Gürcüstan təmsilçisinin məğlubiyyəti ilə başa çatıb – 0:1.
Qeyd edək ki, bu, “Neftçi”nin rəqibinin ölkə xaricindəki toplanış çərçivəsində keçirdiyi dördüncü sınaq matçı idi. Bundan öncə Rumıniya təmsilçisi “Astra” ilə görüşdə qüvvəsini sınayan Gürcüstan çempionu 0:1 hesablı məğlubiyyətlə üzləşmişdi. Bolqarıstan təmsilçisi “Lokomotiv”lə (Plovdiv) oyun gürcülərin 3:2 hesablı qələbəsiylə başa çatmışdı. Rumıniya təmsilçisi “Steaua” (Buxarest) ilə qarşılaşmada isə hesab açılmamışdı – 0:0.
Sonda onu da bildirək ki, “Neftçi” ilə “Zestafoni” arasındakı ilk oyun iyulun 17-də “Dalğa Arena”da keçiriləcək və yerli vaxtla saat 21:00-da başlayacaq. Cavab görüşü isə bir həftə sonra Zestafonidə baş tutacaq.
