12 iyul 2012 13:47
FİFA-nın sabiq prezidentinə qarşı rüşvət ittihamı
Hazırda ağır vəziyyətdə xəstəxanada müalicəsini davam etdirən Joao Avelanj FİFA prezidenti olduğu vaxt kifayət qədər böyük məbləğdə rüşvət alıb. Azerisport.az xəbər verir ki, bu fakt İsveçrə ali məhkəməsi tərəfindən müvafiq sənədin dərc olunmasından sonra üzə çıxıb.
Avelanjla yanaşı, Braziliya Futbol Konfederasiyasının keçmiş prezidenti Rikardo Teyşeyranın da qeyri-qanuni ödənişlər aldığı bildirilir. Hər iki şəxsin adı dünya çempionatı oyunlarının teleyayımı ilə bağlı ISMM/ISL marketinq şirkətindən FİFA İcraiyyə Komitəsi üzvlərinin rüşvət alması ilə bağlı qalmaqalda hallanır. Avelanjın ən azı 1 milyon funt sterlinq, Teyşeyranın isə 8,37 milyon funt sterlinq rüşvət aldığı bildirilir.
Qeyd edək ki, Joao Avelanj 2011-ci ildə səhhəti ilə əlaqədar Beynəlxalq Olimpiya Komitəsi üzvlüyündən istefa verib. Lakin elə həmin vaxt bir çox mətbu orqan bu gedişin məhz 1990-cı illərdə dünya çempionatının yayım hüququnun alınması zamanı rüşvət qalmaqalı ilə əlaqələndirib. Avelanj 1974 – 1998-ci illərdə FİFA prezidenti olub. Onu hazırkı prezident Yozef Blatter əvəzləyib.
