12 iyul 2012 01:43
İnter yoxlama matçında qalib gəldi
Gələn mövsüm üçün hazırlığlarını davam etdirən "İnter"in əvəzedici heyəti növbəti yoxlama görüşünü keçirib. Azerisport.az xəbər verir ki, Zabrat qəsəbə stadionunda birinci dəstə təmsilçisi "Neftçala" komandası ilə qarşılaşan əvəzedicilər bu görüşdə 4:2 hesablı qələbə qazanıblar.
"İnter"in heyətində Nurxan Mənsimzadə iki qol vurub. Digər topları isə Əbülfəz Hüseynli və Kənan Cəfərov rəqib qapısından keçiriblər.
Qeyd edək ki, ayın 14-də Tofiq Mustafayevin yetirmələri Qusara yollanaraq orada növbəti təlim-məşq toplanışı keçirməklə gələn mövsüm üçün hazırlığlarını başa vuracaq.
"Neftçala" komandası ilə matçdan sonra "İnter"in əvəzedici heyətinin baş məşqçisi Tofiq Mustafayev keçirilmiş oyun haqqında danışıb: "Bu görüş yoxlama xarakteri daşıyırdı. Qarşılaşmanın əsas məqsədi komandamızın fiziki və taktiki hazırlığlarını nəzərdən keçirmək idi. Oyundan razı qalsam da etiraf etmək istərdim ki, komandada bəzi çatışmamazlığlar var. İlk növbədə xətlər arasındaki əlaqə üzərində işləməliyik, müdafiədən hücuma daha tez keçməliyik. Demək istərdim ki, əsas problemlərimizdən biri yerinə yetirdiyimiz künc zərbələrindən sonra müdafiə zonasına çox gec qayıdmağımızdı. Bundan başqa, əsas komandanın rəhbərliyinə də öz minnətdarlığımı bildirmək istərdim. Onlar əsas heyətlə birgə məşq edən bir neçə futbolçunu-Ramil Mansurovu, Aleksandr Qrossu və Roman Cəfərovu bu oyun üçün bizim sərəncamına buraxıblar və adıçəkilən oyunçular bizə bu görüşdə kömək göstəriblər".
