13 iyul 2012 14:37
Slavço Georgiyevski: İnter Asterasla oyunlarda da özünü yaxşı tərəfdən göstərməlidi
“İnter”in yarımmüdafiəçisi Slavço Georgiyevski Avropa Liqasının birinci təsnifat mərhələsində Estoniya “Trans”ına qarşı keçirilən cavab matçından sonra azerisport.az saytının suallarını cavablandırıb. Makedoniyalı futbolçu 2:0 hesablı qələbə qazandıqları görüşlə bağlı öncə bunları dilə gətirib:
“Bu gün biz Estoniyada başladığımız işi başa vurduq. Fikrimcə, etməli olduğumuzu həyata keçirdik. Yəni qələbə qazanmağı. Şadam ki, növbəti mərhələyə vəsiqə qazandıq”.
“Bu gün biz Estoniyada başladığımız işi başa vurduq. Fikrimcə, etməli olduğumuzu həyata keçirdik. Yəni qələbə qazanmağı. Şadam ki, növbəti mərhələyə vəsiqə qazandıq”.
Slavçonun sözlərinə görə, ilk oyundakı darmadağından (5:0) sonra rəqib komandanın Bakıda müdafiəyə daha çox qapanması onlar üçün gözlənilməz olmayıb: “Estonlar gözlənilməz heç nə göstərmədilər. Bizim gözlədiyimiz kimi oynadılar. Şübhəsiz ki, müdafiədən oynamağa çalışırdılar. Bu da yəqin ki, başa düşüləndi. Biz də oyuna ciddi yanaşırdıq. Hər şeyə ilk oyunda aydınlıq gəlsə də, bu görüşdə də qalib gəlmək istəyirdik”.
Georgiyevski bu oyunda ilk qolun müəllifi olmasına da toxunub: “Əlbəttə, şadam ki, mən də qol vurdum. Maraqlı zərbə alındı. Amma qol olmasaydı da, o zərbəni vuracaqdım. Əsas odu ki, hədəfə düşdü və komandama kömək etdi”.
“İnter”in dayaq yarımmüdafiəçisi Avroliqanın ikinci təsnifat mərhələsində onları gözləyən Yunanıstanın “Asteras” klubundan da danışıb: “Düzünü deyim ki, hələ yunanlar haqda düşünməmişəm. İndi də bütün fikirlərim estonlarla cavab oyununun yanındadı. Lakin tezliklə “Asteras”la oyunların hazırlıqlarına start verəcəyik. İstənilən halda rəqibimiz sıradan bir komanda sayıla bilməz. Buna baxmayaraq, biz özümüzü yaxşı tərəfdən göstərməliyik”.
Georgiyevski “Asteras”la oyunlardakı şanslarından da danışıb: “Hələ bu barədə nəsə deməkdə çətinlik çəkirəm. Hazırda “Asteras”ın nə dərəcədə güclü komanda olduğunu yaxşı bilmirəm. Məşqçilərimiz hələ informasiya toplayacaqlar və rəqib barədə bizə hər şeyi izah edəcəklər. Fikrimcə, hər şeyi oyunlar göstərəcək”.
