15 iyul 2012 13:15
Simurqda iki bolqarıstanlı futbolçu (FOTO)
Yeni mövsümə iddialı heyət qurmağı planlaşdıran "Simurq" Avstriyadakı təlim-məşq toplanışı zamanı bir neçə legioner futbolçunu baxışa dəvət edib. Azerisport.az xəbər verir ki, bu barədə bölkə klubunun rəsmi saytı məlumat yayıb.
Onlardan artıq ikisi komandanın düşərgəsinə qoşulub. Yarımmüdafiəçi Daniel Peyev və hücumçu Miroslav Antonov artıq bu gün baş tutan ilk məşqdə də iştirak edib. Onların hər ikisi Bolqarıstandadı. Sabah komandanın heyətinə yeni futbolçular təşrif buyuracaq.
Qeyd edək ki, Peyev 2002–2003 mövsümündə Sofiya “Lokomotiv”ində (17 oyun, 1 qol), 2004-2008-də “Rodopa Smolyan”da (83 oyun, 14 qol), 2008-2009-da “Pirin”də (48 oyun, 11 qol), 2010-2011-də “Slavia”da (55 oyun, 8 qol) çıxış edibi. 27 yaşlı futbolçu hazırda yenidən peşəkar karyerasına başladığı Sofiya “Lokomotiv”inə dönsə də, “Simurq”a keçidi baş tutsa, köhnə-yeni klubundan oyuna çıxmamış ayrılmalı olacaq.
Antonova gəlincə, o, bolqar hücumçu 1986-cı ildə anadan olub. O, peşəkar karyerasında 2005-2006 mövsümündə “Minyor”da başlayıb – 25 oyuna 5 qol. 2006-2008 mövsümündə “Montana” (42 oyun, 7 qol), 2008-2010 mövsümündə “Sportist Svoge” (44 oyun, 20 qol) klublarında çıxış edən futbolçu 2010-cu ildə Sofiya “Levski”sinə transfer olunub. Amma bu komandada cəmi 14 oyun (4 qol) keçirən Antonov elə həmin il icarə əsasında “Montana”da (8 oyun, 2 qol) çıxış edib. 2011-ci ildə “Ludogorets”ə transfer olunan oyunçu burda 8 oyuna 3 qol vurub. Son mövsümdə isə o, icarə əsasında “Montana”da oynayıb – 14 oyuna 7 qol. Transfer hüquqları hələ də “Ludogorets”ə məxsus olan oyunçunun “Simurq”dakı taleyinə yaxın günlərdə aydınlıq gələcək.
