16 iyul 2012 15:19
“Getdikcə daha yaxşı oyun göstərib, daha yaxşı nəticələr əldə edəcəyik”
“Qəbələ”nin baş məşqçisi Fatih Kavlak Sloveniyada baş tutan ilk yoxlama görüşündən – Çexiya təmsilçisi “MFK Karvina” ilə (0:1) qarşılaşmadan sonra fikirlərini bölüşüb. Azerisport.az xəbər verir ki, türkiyəli mütəxəssis hazırlıq matçından istədiklərini aldığını söyləyib:
“Sloveniyadakı ilk hazırlıq matçını arxada qoyduq. Bu qarşılaşmada məqsədimiz futbolçuların oyun tempinə uyğunlaşması prosesinə start vermək idi. Həm də futbolçuların birlikdə oynamasına, bir-birinə öyrəşməsinə ehtyac var idi ki, sözügedən qarşılaşma bunun başlanğıcı oldu. Oyundan istədiklərimizi aldıq. Futbolçular verilən tapşırıqları yerinə yetirdilər. Amma müəyyən qüsurlar, çatışmazlıqlar da oldu. Belə yoxlama görüşlərini keçirməyimizdə məqsəd məhz bu qüsurları görmək və onları aradan qaldırmaqdı”.
Komandanın yaxşı fiziki durumda olduğunu deyən Kavlak heyətdəki futbolçuların, xüsusilə də yeni transferlərin onlardan gözlənən performansı ortaya qoyduğunu bildirib:
“Komandanın fiziki durumunu bəyəndim. Oyundan bir gün öncə və oyun günü ümumilikdə 3 məşqə çıxmışdıq. Komandadakı bütün futbolçular onlardan gözlədiyimiz performansı ortaya qoydular. Yeni futbolçular da komandaya qısa müddətdə uyğunlaşmaları ilə diqqət çəkdilər. Sanki uzun müddətdi “Qəbələ”də oynayırlar. Matçda bizi mənfi mənada təəccübləndirən hər hansı bir hadisə yaşanmadı. Hər şey istədiyimiz kimi davam və inkişaf edir”.
Baş məşqçi qarşıdakı yoxlama görüşlərində oyun tempinin getdikcə yüksələcəyini və bu matçlarda ideal heyəti müəyyənləşdirəcəklərini söyləyib:
“Qarşıdakı oyunlarda temp getdikcə yüksələcək. Taktiki-texniki tapşırıqlarımızı verib, bir-biri ilə anlaşan ideal heyətimizi müəyyənləşdirəcəyik. Getdikcə daha yaxşı oyun göstərib, daha yaxşı nəticələr əldə edəcəyik”.
