Tərlan Əhmədov: Zestafoni ilə oyunda tam fərqli Neftçi görəcəksiz

Azərbaycan çempionu “Neftçi”nin məşqçisi Tərlan Əhmədov UEFA Çempionlar Liqasının ikinci təsnifat mərhələsi çərçivəsində qarşılaşacaqları Gürcüstan “Zestafoni”si ilə sabah baş tutacaq ilk oyunla bağlı fikirlərini açıqlayıb. Azerisport.az xəbər verir ki, o, öncə bunları dilə gətirib:

 

“Biz iki mərhələdən ibarət toplanış keçirdik. Fikrimcə, hər şey uğurlu alındı. Oyunumuzda inkişaf diqqət çəkir. Yeni futbolçular demək olar ki, komandaya uğyunlaşıblar. “Neftçi”də problem yoxdu. Yalnız Rodriqinyo və Bahodir Nasimovun zədəsi var. Buna baxmayaraq, hədəfimiz yalnız növbəti mərhələyə adlamaqdı”.

 

Əhmədov rəqib komanda barədə də danışıb: “Zestafoni”nin oyununu görmüşük. Onlar haqda xeyli məlumatımız var. Yaxşı komandadı. Ötən mövsüm onlar hətta qrup mərhələsinə də vəsiqə qazana bilərdi. Rəqibimizin zəif cəhətlərindən danışmaq istəmirəm. Bircə onu bilirik ki, bu komandanı keçə bilməsək, çox tənqid olunacağıq. Ona görə də məsuliyyətimizi dərk edirik”.

 

“Ağ-qaralar”ın çalışdırıcısı hər şeyə ilk oyunda aydınlıq gətirmək istədiklərini bəyan edib: “Biz ilk oyunda elə nəticə qazanmaq istəyirik ki, rəqibimiz doğma meydanda nəyəsə ümid etməsin. Əsas qol buraxmamaqdı. Bilirik ki, gürcülər təxribata əl ata bilərlər. Amma biz soyuqqanlılığımızı itirməməli, hər şeyə hazır olmalıyıq”.

Əhmədov hücum xəttində kimlərə üstünlük veriləcəyinə dair sualı belə cavablandırıb: “Nasimov yaxşı futbolçudu. Amma Kanalesin də yaxşı keyfiyyətləri var. Sabah siz özünüz də onu iş başında görəcəksiz”.

 

“Neftçi”nin çalışdırıcısı komandanın gücləndiyini iddia edir: “Komandadan hər kəs gedə bilər. Amma yeni aldığımız futbolçular gedənlərdən daha güclüdülər. Sabah siz tamamilə fərqli komanda görəcəksiz. Start heyət hələ məlum deyil. Onu oyun öncəsi müəyyənləşdirəcəyik”.

 

Baş məşqçi Böyükağa Hacıyev xəstələndiyindən jurnalistlər önünə çıxa bilməmişdi. Bu məsələyə də toxunan Əhmədov bunları dilə gətirib: “Hacıyevin yoxluğunu mənfi haldı. Amma ümid edirəm ki, bu, komandaya təsir etməyəcək. Onun tezliklə sıraya dönəcəyinə ümidliyik”.