18 iyul 2012 13:02
“Xəzər Lənkəranla oyunlar bizim üçün çox vacibdi”
Polşanın “Lech” klubunun müdafiəçisi Hubert Volyakeviç müsahibəsində Avropa Liqasının ikinci təsnifat mərhələsində “Xəzər Lənkəran”a qarşı keçirəcəkləri oyunlardan danışıb, 2008-ci ildəki oyunları yada salıb. Azerisport.az onun bəzi diqqətçəkən açıqlamaları ilə sizi də tanış edir.
“Kiminlə, harda oynamağımızdan asılı olmayaraq, biz həmişə qələbə qazanmaq istəyirik. Bizim devizimiz də belədi. Avropa Liqasında qrup mərhələsinə düşməyi hədəfləmişik. Böyük futbolun dadını hiss etmək istəyirik”.
“Lech” Avroliqanın birinci təsnifat mərhələsində Qazaxıstan “Lech”i ilə cavab oyununda olduğu kimi, “Xəzər Lənkəran”la səfər matçına da bir gün öncə yollanıb. Volyakeviç bunu komandası üçün daha uğurlu addım saydığını deyir: “Hər halda məşqçilərimiz nə etdiklərini yaxşı bilirlər. Biz onlara tam inanırıq. “Xəzər Lənkəran”la oyunlar bizim üçün çox vacibdi. Oyundan-oyuna artırırıq. Bu da bizi ancaq sevindirə bilər”.
Volyakeviç “Xəzər Lənkəran”la “Lech” arasında 2008-ci ildə baş tutan oyunlarda forma geyə bilməsə də, yaxşı xatırladığını deyir: “Təbii ki, bu komanda üzərində doğma meydanda qazandığımız 4:1 hesablı qələbəni yaxşı xatırlayıram. Hazırda isə çox şey dəyişib. Məsələn, növbəti rəqibimiz “Jetisu” (Qazaxıstan) ilə müqayisədə daha güclüdü. Lakin hər şeyə qarşıdakı oyunlardan sonra aydınlıq gələcək”.
Poznan təmsilçisinin futbolçusu Lənkəranda baş tutacaq səfər matçında mütləq qol vurmaq lazım olduğunu deyir: “Belə olan halda biz daha yaxşı şans qazanmış olacağıq. Azərbaycan və Qazaxıstan kimi ölkələrin futbolu hazırda inkişaf etməkdədi. Onlar da indi Avropanın qalan ölkələrinə çatmaq istəyirlər. Lakin biz rəqibimizin azərbaycanlılar və ya almanlar olmasından asılı olmayaraq, öz işimizi görməliyik”.
“Lech” “Jetisu” ilə səfər matçının ilk 15 dəqiqəsində çox pis oyun sərgiləyib. Volyakeviç bunun təkrarlanmasını istəmir: “Bu, müəyyən qədər yorğunluqla bağlı idi. Çünki yolda çox vaxt keçirmişdik. Amma məşqçilərin sözlərinə görə, Azərbaycanda bu, təkrarlanmamalıdı”.
